Pro Kabaddi: చెల‌రేగిన ప‌వ‌న్.. టోర్నీలోనే బెంగ‌ళూరు అతి పెద్ద‌ విజ‌యం

బెంగ‌ళూరు: ప్రొ క‌బ‌డ్డీ లీగ్‌లో మ‌రో మ్యాచ్ టైగా ముగిసింది. గెలుపు కోసం హ‌ర్యాణా స్టీలర్స్, యూపీ యోధా ప‌ట్టు వ‌ద‌ల‌కుండా పోరాడ‌డంతో చివరికి స్కోర్లు స‌మం అయ్యాయి. ఏక ప‌క్షంగా సాగిన మ‌రో పోరులో ద‌బాంగ్ ఢిల్లీపై ఘ‌న విజ‌యం సాధించి బెంగ‌ళూరు బుల్స్ టోర్నీలోనే అతిపెద్ద విజ‌యం న‌మోదు చేసింది.

హోరాహోరీగా త‌ల‌ప‌డిన హ‌ర్యాణా, యూపీ

ప్రొక‌బ‌డ్డీ లీగ్ సీజ‌న్ 8లో హ‌ర్యాణా స్టీల‌ర్స్‌, యూపీ యోధా నువ్వా నేనా అన్నట్టు త‌ల‌ప‌డ్డాయి. చివ‌రి క్ష‌ణం వ‌ర‌కు ఇరు జ‌ట్లు ప‌ట్టు వ‌ద‌ల‌లేదు. ఫ‌స్టాప్ ముగిసే స‌మ‌యానికి యూపీ యోధా 14-13 తేడాతో స్వ‌ల్ప అధిక్యంలో నిలిచింది. అయితే సెకాండాఫ్ ఆరంభంలో యూపీ యోధా జ‌ట్టు చెలరేగింది. దీంతో హ‌ర్యాణా స్టీల‌ర్స్‌పై 8 పాయింట్ల అధిక్యంలోకి దూసుకెళ్లింది.

ఈ స‌మ‌యంలో యూపీ అధిక్యానికి హ‌ర్యాణా కెప్టెన్ వికాస్ కండోలా గండి కొట్టాడు. వ‌రుస‌గా రైడ్ పాయింట్లు సాధిస్తూ హ‌ర్యాణాను మ్యాచ్‌లోకి తెచ్చాడు. చివ‌ర్లో ఇరు జ‌ట్లు ప‌ట్టు వ‌ద‌ల‌క‌పోవ‌డంతో చివ‌రికి మ్యాచ్ 36-36 తేడాతో టైగా ముగిసింది. హ‌ర్యాణా జ‌ట్టులో వికాస్ 17 పాయింట్ల‌తో స‌త్తా చాటాడు. యూపీ జ‌ట్టులో సురేంద‌ర్ గిల్ 14 పాయింట్ల‌తో రాణించాడు.

టోర్నీలోనే భారీ విజ‌యం

ద‌బాంగ్ ఢిల్లీ, బెంగ‌ళూరు బుల్స్ మ‌ధ్య జ‌రిగిన మ‌రో మ్యాచ్ ఏక‌ప‌క్షంగా సాగింది. ఈ మ్యాచ్‌లో స‌త్తా చాటిన బెంగ‌ళూరు బుల్స్ ప్రొ క‌బ‌డ్డీ లీగ్ సీజ‌న్ 8 లోనే అతి పెద్ద విజ‌యం న‌మోదు చేసింది. బెంగళూరు రైడ‌ర్ ప‌వ‌న్ కుమార్ 22 రైడ్లు చేసి రికార్డు స్థాయిలో 27 పాయింట్ల‌తో చెల‌రేగాడు.

భ‌ర‌త్ 7, చంద్ర‌న్ 5 పాయింట్ల‌తో అత‌నికి స‌హ‌క‌రించారు. ఇక ఢిల్లీ జ‌ట్టులో ఎవ‌రూ అంత‌గా రాణించ‌లేదు. అశు మాలిక్ 6, విజ‌య్ మాలిక్ 4 పాయింట్లు సాధించారు. దీంతో మ్యాచ్ మొత్తంలో పూర్తి అధిప‌త్యాన్ని క‌న‌బ‌రిచిన బెంగ‌ళూరు బుల్స్ 61- 22 తేడాతో ఘ‌న విజ‌యం సాధించింది. బెంగ‌ళూరు ఏకంగా 39 పాయింట్ల తేడాతో విజ‌యం సాధించ‌డం విశేషం.