ఒలింపిక్స్: పోరాడినా భారత్ హాకీ జట్టుకి తప్పని ఓటమి

లండన్, జులై 31: గత ఒలింపిక్స్‌లో భారతదేశపు కీర్తి ప్రతిష్టతలను దశదిశలా ఇమడింపజేసిన ఇండియన్ హాకీ గత ఎనిమిది సంవత్సరాలుగా ఒలింపిక్స్‌లో అర్హత సాధించలేదు. ప్రస్తుతం జరుగుతున్న లండన్ ఒలింపిక్స్‌లో అర్హత సాధించినప్పటికీ.. సోమవారం ప్రిలిమినరీ మ్యాచ్‌లో నెదర్లాండ్స్‌తో జరిగిన గ్రూప్‌-బి మ్యాచ్‌లో భారత్‌ 2-3 గోల్స్‌ తేడాతో ఓటమి చవిచూసింది. లండన్ ఒలింపిక్స్‌లో భారత్ పదో ర్యాంక్‌లో కొనసాగుతుండగా.. నెదర్లాండ్స్ మూడో ర్యాంక్‌లో కొనసాగుతుంది. పటిష్టంగా ఉన్న నెదర్లాండ్స్‌తో జరిగిన మ్యాచ్‌లో భారత్ అధ్బుతమైన పోరాట పటిమను కనబరిచింది.

ప్రణాళికలను సమర్థంగా అమలు చేయలేకపోయిన టీమిండియా తొలి అర్ధభాగంలో గోల్స్ చేయలేకపోయింది. పదునైన దాడులతో చెలరేగి డచ్ ఆటగాళ్లు అనుకున్న ఫలితాన్ని రాబట్టారు. ఒకరి గోల్‌ పోస్ట్‌వైపు మరోకరూ దూసుకుపోయేందుకు ప్రయత్నించారు. 19వ నిమిషంలో రాబర్ట్‌ మొదటి గోల్‌ సాధించి పెట్టాడు. 28వ నిమిషంలో రొడెరిక్‌ ఆధిక్యాన్ని రెండుకు పెంచాడు. రెండో అర్ధభాగంలో భారత శిబిరం వ్యూహం మార్చి వేగంగా ఆడుతూ అటాకింగ్‌కు దిగింది. దీంతో 44వ నిమిషంలో ధరమ్‌వీర్‌ సింగ్‌, 47వ నిమిషంలో శివేంద్ర సింగ్‌ గోల్స్‌ సాధించారు. అయితే 50వ నిమిషంలో మింక్‌ వండర్‌ చేసిన గోల్‌తో నెదర్లాండ్స్‌ మళ్లీ పైచేయి సాధించింది.

తర్వాత గోల్స్ కోసం భారత్ చేసిన ప్రయత్నాలు ఫలించలేదు. బుధవారం జరిగే రెండో మ్యాచ్‌లో భారత్.... న్యూజిలాండ్‌తో తలపడుతుంది. మరో మ్యాచ్‌ల్లో ప్రపంచ చాంపియన్ ఆస్ట్రేలియా 6-0తో దక్షిణాఫ్రికాపై గెలిచింది. కెప్టెన్ జెమీ డ్వేయర్ 'హ్యాట్రిక్'తో చెలరేగాడు. ఈ మూడు గోల్స్‌తో అతను ఆసీస్ మాజీ ఆటగాడు మార్క్ హాగర్ (179 గోల్స్) రికార్డును సమం చేశాడు. ఇతర మ్యాచ్‌ల్లో కొరియా 2-0తో న్యూజిలాండ్‌పై గెలవగా; స్పెయిన్, పాకిస్థాన్ మ్యాచ్ 1-1తో డ్రా అయ్యింది.

తెలుగు వన్ఇండియా