కేటీఆర్ రిట్వీట్, మద్దతుగా నిలిచిన కోహ్లీ

సందేశాన్ని అందరికీ చేరవేయండని

ఛెత్రీ వీడియోను రీట్వీట్ చేయండి, అతడి సందేశాన్ని అందరికీ చేరవేయండని కేటీఆర్ కోరారు. భారత ఫుట్‌బాల్ జట్టు ఆడే మ్యాచ్‌లను స్టేడియానికి వెళ్లి చూడాలని కోహ్లి తన అభిమానులను ట్విట్టర్ ద్వారా కోరాడు. ఫుట్‌బాల్, క్రీడలను ఆదరించండని కోహ్లి పిలుపునిచ్చాడు. దేశంలో క్రీడా సంస్కృతి పెంపొందించాలని విరాట్ సూచించాడు.

భారత ఫుట్‌బాల్‌ జట్టు ఆడే మ్యాచ్‌లను

‘మమ్మల్ని తిట్టండి, విమర్శించండి. కానీ భారత ఫుట్‌బాల్‌ జట్టు ఆడే మ్యాచ్‌లను స్టేడియానికి వచ్చి చూడండ'ని అని ఛెత్రి అభిమానులను అభ్యర్థించాడు. ‘‘యూరోపియన్‌ ఫుట్‌బాల్ క్లబ్‌లకు సపోర్ట్ తెలిపే మీ అందరికీ ఒకటి చెప్పాలనుకుంటున్నా. ఆటలో వారి స్థాయిని మేం అందుకోలేకపోవచ్చు. మా మ్యాచ్‌కు వచ్చి టైం వేస్ట్ ఎందుకు చేసుకోవాలని అనిపించొచ్చు. మేం కాదనట్లేదు, ఆ స్థాయిలో మా ఆట లేదనే విషయాన్ని కూడా ఒప్పుకుంటాం. కానీ ఆట పట్ల మా నిబద్ధత, ప్రేమతో మిమ్మల్ని అలరించడానికి కష్టపడతాం.

ఫుట్‌బాల్‌ మీద నమ్మకం కోల్పోయిన మీరు

భారత ఫుట్‌బాల్‌ జట్టు మీద నమ్మకం కోల్పోయిన మీరు ఒక్కసారి స్టేడియానికి వచ్చి మా ఆట చూడండి. నెట్లో మమ్మల్ని తిట్టడం కాదు. గ్రౌండ్‌కొచ్చి ముఖం మీదే మమ్మల్ని తిట్టండి. ఏదో ఒకరోజు మీ ప్రవర్తనలో మార్పు రావొచ్చు. మీ సపోర్ట్ మాకెంత అవసరమో మీరు తెలుసుకోలేకపోతున్నారు'' అని ఛెత్రి బాధగా చెప్పాడు.

భారత ఫుట్‌బాల్ జట్టు 97వ స్థానంలో

ప్రస్తుతం భారత ఫుట్‌బాల్ జట్టు 97వ స్థానంలో ఉంది. శుక్రవారం నాలుగు దేశాల టోర్నీ ప్రారంభం కాగా.. మొదటి మ్యాచ్‌లో 5-0 తేడాతో చైనీస్‌ తైపీపై గెలుపొందింది. ఈ మ్యాచ్‌కి ఆదరణ కరువైంది. కేవలం 2569 మంది ప్రేక్షకులే ఈ మ్యాచ్ చూసేందుకు వచ్చారు. దీంతో ముంబైలోని ఫుట్‌బాల్‌ ఎరీనా స్టేడియం ఖాళీగా కనిపించింది. హ్యాట్రిక్ గోల్స్‌తో జట్టును గెలిపించినప్పటికీ ప్రేక్షులెవరూ లేకపోవడం చెత్రీని కలచి వేసింది.