FIFA World Cup 2026: సౌత్‌ కొరియాపై విజయం.. రెండో రౌండ్‌కు దూసుకెళ్లిన మెక్సికో!

సొంతగడ్డపై జరుగుతున్న ఫిఫా ప్రపంచకప్‌ 2026 టోర్నీలో మెక్సికో జోరు కొనసాగిస్తోంది. ఎస్టాడియో గ్వాడలజారా వేదికగా గురువారం జరిగిన ఉత్కంఠభరిత పోరులో మెక్సికో 1-0 తేడాతో సౌత్ కొరియా‌ను ఓడించింది. ఈ విజయంతో రెండో రౌండ్‌కు అర్హత సాధించింది. మెక్సికో మిడ్‌ఫీల్డర్ లూయిస్ రోమో 50వ నిమిషంలో చేసిన ఏకైక గోల్ మ్యాచ్ ఫలితాన్ని శాసించింది.

FIFA World Cup 2026: తల్లి ప్రేమకు తలొగ్గిన అమెరికా!

ఫస్టాఫ్‌లో ఇరు జట్లు ఆచితూచి ఆడటంతో మ్యాచ్ కాస్త నెమ్మదిగా సాగింది. అయితే, సెకాండాఫ్ ప్రారంభమైన కొద్దిసేపటికే సౌత్ కొరియా గోల్‌కీపర్ కిమ్ స్యుంగ్-గ్యు చేసిన ఘోర తప్పిదం మెక్సికోకు వరంగా మారింది. జూలియన్ క్వినోనెస్ అందించిన క్రాస్‌ను రౌల్ జిమెనెజ్ హెడర్ చేయగా, దానిని పట్టుకునే క్రమంలో కొరియా కీపర్ కిమ్ తన సొంత జట్టు ఆటగాడు లీ గి-హ్యుక్‌ను ఢీకొట్టి బంతిని చేజార్చాడు. అక్కడే సిద్ధంగా ఉన్న లూయిస్ రోమో ఖాళీ నెట్‌లోకి బంతిని వాలీ షాట్ ద్వారా పంపి మెక్సికోకు 1-0 ఆధిక్యాన్ని అందించాడు.

ఈ గోల్‌తో 31 ఏళ్ల లూయిస్ రోమో ఒక అరుదైన రికార్డును తన ఖాతాలో వేసుకున్నాడు. మెక్సికో తరఫున వరల్డ్ కప్ అరంగేట్రంలోనే గోల్ చేసిన రెండో అత్యంత వృద్ధ ఆటగాడిగా (31 ఏళ్ల 13 రోజులు) నిలిచాడు.

ఆ తర్వాత కొరియా పుంజుకునేందుకు ప్రయత్నించినప్పటికీ మెక్సికో డిఫెన్స్ లైన్ గట్టిగా నిలబడింది. ముఖ్యంగా 87వ నిమిషంలో కొరియా ఆటగాళ్లు చో గ్యు-సంగ్, యాంగ్ హ్యున్-జున్ వరుసగా చేసిన రెండు గోల్ ప్రయత్నాలను మెక్సికో గోల్‌కీపర్ రౌల్ రాంగెల్ అద్భుతమైన 'డబుల్ సేవ్'తో అడ్డుకుని జట్టును గెలిపించాడు. ఎక్స్‌పెక్టెడ్ గోల్స్ పరంగా సౌత్ కొరియా (0.69) మెక్సికో (0.48) కంటే మెరుగ్గా ఉన్నప్పటికీ, మెక్సికో డిఫెన్స్ విజయాన్ని లాగేసుకుంది.

ఈ గెలుపుతో గ్రూప్-A లో అగ్రస్థానాన్ని ఖరారు చేసుకున్న మెక్సికో తదుపరి దశకు చేరగా.. సౌత్ కొరియా నాకౌట్ ఆశలు సజీవంగా ఉండాలంటే సౌతాఫ్రికాతో జరిగే చివరి మ్యాచ్‌లో కనీసం డ్రా అయినా చేసుకోవాల్సి ఉంటుంది.

'నీ స్వార్థమే జట్టును ముంచింది’.. లైవ్‌లోనే రొనాల్డోను తిట్టిన ఫ్రాన్స్ దిగ్గజం