మెస్సీకి వరల్డ్ కప్ గెలుచుకోవడం కలగానే మిగిలిపోనుందా..??

ఒక గోల్‌తో సరిపెట్టి మ్యాచ్‌ను డ్రాగా ముగించి:

పసికూన ఐస్‌లాండ్‌తో జరిగిన తొలి మ్యాచ్‌లో కేవలం ఒక గోల్‌తో సరిపెట్టి మ్యాచ్‌ను డ్రాగా ముగించిన మెస్సీ.. గురువారం రాత్రి క్రోయేషియాతో జరిగిన రెండో మ్యాచ్‌లో కనీసం ఆ మార్క్‌ని కూడా అందుకోలేకపోవడంతో అర్జెంటీనా ఘోర పరాజయాన్ని చవిచూసింది. దీంతో.. ఆ జట్టు నాకౌట్ దారులు దాదాపు మూసుకుపోయాయి.

మెస్సీ విఫలమవుతుంటే.. పోర్చుగల్ రొనాల్డొ అదిరిపోయేలా:

టోర్నీలో మెస్సీ పేలవంగా విఫలమవుతుంటే మరో స్టార్ పోర్చుగల్ ప్లేయర్ రొనాల్డొ అదిరిపోయే ప్రదర్శన చేసి అందరినీ ఆకట్టుకుంటున్నాడు. ఈ నేపథ్యంలో అతనితో పోల్చి మెస్సీని మరింత కుంగదీస్తున్నారు విమర్శకులు. సుదీర్ఘకాలంగా ఫుట్‌బాల్ ఆడుతున్న మెస్సీ ఇప్పటి వరకు ఒక ప్రపంచకప్‌ను కూడా ముద్దాడలేదు.

2015, 2016 ఫైనల్లోనూ అర్జెంటీనాకి నిరాశ తప్పలేదు:

2014లో జరిగిన ప్రపంచకప్‌ ఫైనల్ మ్యాచ్‌లో 0-1 తేడాతో జర్మనీ చేతిలో అర్జెంటీనా ఓడిపోయింది. ఆ తర్వాత 2015, 2016 కోపా అమెరికా ఫైనల్లోనూ అర్జెంటీనాకి నిరాశ తప్పలేదు. దీంతో.. 2016లో రిటైర్మెంట్ ప్రకటించిన మెస్సీ.. మళ్లీ ఆ నిర్ణయాన్ని వెనక్కి తీసుకున్నాడు. కానీ.. ఈసారి కూడా ప్రపంచకప్ గెలవాలనే అతని కోరిక నెరవేరేలా కనిపించడం లేదు.

మెస్సీకి ఇదే ఆఖరి ప్రపంచకప్‌:

మరి కొద్ది రోజుల్లోనే 31లోకి అడుగుపెట్టనున్న మెస్సీకి ఇదే ఆఖరి ప్రపంచకప్‌ కావొచ్చు. ఈ నేపథ్యంలో.. అతనికి వరల్డ్‌కప్ అందని ద్రాక్షగానే మిగిలిపోయే అవకాశం ఉంది. ఏదనేది అదే గ్రూపుకు చెందిన అర్జెంటీనా సహచర జట్టు మరో మ్యాచ్ ఆడిన తర్వాత అర్జెంటీనా జట్టు దారి ఎటు అనేది తేలిపోనుంది.