పోర్చుగల్, ఐవరీ కోస్ట్ మ్యాచ్ డ్రా, అభిమానులకు నిరుత్సాహం

పోర్ట్‌ ఎలిజబెత్‌: పోర్చుగల్‌, ఐవరీకోస్ట్‌ జట్ల మధ్య జరిగిన పోరు నిస్సారంగా ముగిసింది. గ్రూప్‌ 'జి'లో భాగంగా మంగళవారం జరిగిన ఈ మ్యాచ్‌ లో రెండు జట్లు ఒక్క గోల్‌ కూడా చేయలేదు. దాంతో మ్యాచ్‌ 0-0తో 'డ్రా' అయింది. పది రోజుల క్రితం మోచేతికి శస్త్రచికిత్స చేయించుకున్న ఐవరీకోస్ట్‌ స్టార్‌ దీదీర్‌ డ్రోగ్బా 66వ నిమిషంలో బరిలోకి దిగినా ఎలాంటి ప్రభావాన్ని చూపలేదు.

మరోవైపు క్రిస్టియానో రొనాల్డో మెరిపించినా బంతిని 'గోల్‌'లోకి పంపించడంలో విఫలమయ్యాడు. ప్రపంచంలోనే అత్యంత ఖరీదైన ఈ ఆటగాడు ఆట పదో నిమిషంలో 25 మీటర్ల దూరం నుంచి కొట్టిన షాట్‌ గోల్‌బార్‌కు తగిలి బయటికి వెళ్లిపోయింది. ఆ తర్వాత రొనాల్డో పలుమార్లు ఐవరీకోస్ట్‌ రక్షణపంక్తి ఆటగాళ్లకు ఇబ్బంది పెట్టినా అంతిమ లక్ష్యాన్ని మాత్రం అందుకోలేకపోయాడు.