సచిన్ Vs గంగూలీ: ఫైనల్ మ్యాచ్‌పై ట్విట్టర్‌లో పోరు

హైదరాబాద్: ఐఎస్ఎల్‌లో క్రికెట్ లెజెండ్ సచిన్ టెండూల్కర్ సహ యజమానిగా ఉన్న కేరళ బ్లాస్టర్స్ జట్టు పైనల్స్‌కు దూసుకెళ్లింది. బుధవారం జరిగిన రెండో సెమీ ఫైనల్‌లో కేరళ పెనాల్టీ షూటౌట్ ద్వారా 3-0తో ఢిల్లీ డైనమోస్‌పై గెలిచి ఫైనల్‌కు అర్హత సాధించింది.

దీంతో ఆదివారం జరిగే ఫైనల్స్‌లో సౌరభ్ గంగూలీ యజమానిగా ఉన్న అథ్లెటికో డీ కోల్‌కతా జట్టుతో కేరళ తలపడనుంది. ఇండియన్ సూపర్ లీగ్ (ఐఎస్ఎల్) సీజన్ వన్‌లో కేరళ బ్లాస్టర్స్ రన్నర్స్‌గా నిలవగా, అథ్లెటికో డీ కోల్‌కతా జట్టు ఛాంపియన్‌గా అవతరించింది.

బుధవారం మ్యాచ్ నిర్ణీత, అదనపు సమయం ముగిసేసరికి ఢిల్లీ 2-1 ఆధిక్యంలో నిలిచింది. అయితే తొలి సెమీస్‌లో కేరళ 1-0తో ఢిల్లీపై గెలువడంతో ఇరు జట్ల స్కోరు 2-2తో సమమైంది. ఈ నేపథ్యంలో సెమీస్ విజేతను నిర్ణయించేందుకు పెనాల్టీ షూటౌట్ అనివార్యమైంది.

షూటౌట్‌లో తొలుత ఢిల్లీ కెప్టెన్ ఫ్లోరెంట్‌తో సహా బ్రూనో పెల్లిసరీ, ఎమర్సన్ కొట్టిన షాట్లను కేరళ గోల్‌కీపర్ సందీప్ నంది అద్భుతంగా అడ్డుకుని జట్టును గెలిపించాడు. కేరళ తరుఫున క్యూరియస్, బెల్‌ఫోర్ట్, మహ్మద్ రఫీక్ షూటౌట్ గోల్స్ చేసి జట్టుని ఫైనల్స్‌కు చేర్చారు.

దీంతో ఆదివారం ఫైనల్స్‌లో సచిన్ సహా యజమానిగా ఉన్న కేరళ జట్టు, గంగూలీ యజమానిగా ఉన్న కోల్‌కతా జట్టుతో తలపడనుండటంతో ఈ మ్యాచ్ సచిన్ Vs గంగూలీగా మారింది. ఈ మేరకు ట్విట్టర్‌లో ఐఎస్ఎల్‌లో సచిన్ Vs గంగూలీ ట్వీట్స్ చేస్తున్నారు.