ఆతిధ్యదేశం దక్షిణాఫ్రికాకు పెద్ద షాక్, లీడ్ లో మెక్సికో

జోహాన్నెస్ బర్గ్: ప్రపంచకప్ ఫుట్ బాల్ కు ఆతిధ్యమిచ్చిన దక్షిణాఫ్రికా మెక్సికో కంటే వెనుకబడింది. స్వదేశంలో జరుగుతున్న ప్రపంచకప్‌ లో దక్షిణాఫ్రికా నాకౌట్‌ దశకు చేరుకునే అవకాశాన్ని త్రుటిలో కోల్పోయింది. చివరి లీగ్‌ మ్యాచ్‌ లో 2006 రన్నరప్‌ ఫ్రాన్స్‌ ను ఓడించినప్పటికీ మెరుగైన గోల్స్‌ సగటులో మెక్సికో కంటే వెనుకబడిపోయింది. ఫలితంగా ఎనిమిది దశాబ్దాల ప్రపంచకప్‌ చరిత్రలో తొలిసారి ఆతిథ్య జట్టు లీగ్‌ దశలోనే నిష్క్రమించింది. దీంతో 'బఫానా బఫానా' అభిమానులకు ఇక ఆతిథ్య భాగ్యమే మిగలనుంది.

చివరి మ్యాచ్‌ లో మేటి జట్టును ఓడించామన్న సంతృప్తితో దక్షిణాఫ్రికా జట్టు తమ ప్రపంచకప్‌ ప్రస్థానాన్ని ముగించింది. నాకౌట్‌ దశకు చేరుకునే అవకాశాలు ఉండాలంటే ఫ్రాన్స్‌పై కచ్చితంగా గెలవాల్సిన మ్యాచ్‌లో దక్షిణాఫ్రికా 2-1తో విజయం సాధించింది. నాలుగు పాయింట్లతో గ్రూప్‌ 'ఎ'లో మెక్సికోతో కలిసి సంయుక్తంగా రెండో స్థానంలో నిలిచింది. అయితే మెరుగైన గోల్స్‌ సగటులో మెక్సికోకంటే వెనుకబడిపోయింది. భారంగా ప్రపంచకప్‌ నుంచి నిష్క్రమించింది. ఈ క్రమంలో ప్రపంచకప్‌ లో లీగ్‌ దశను దాటలేకపోయిన తొలి ఆతిథ్య జట్టుగా నిలిచింది. మరోవైపు జట్టులో లుకలుకలతో దక్షిణాఫ్రికాగడ్డపై అడుగుపెట్టిన 2006 రన్నరప్‌ ఫ్రాన్స్‌ ఓటమిభారంతో ఇంటిముఖం పట్టింది.