FIFA WC 2026: రొనాల్డోకు బిగ్ షాక్.. పసికూన చేతిలో చిక్కుకున్న పోర్చుగల్!

ఫిఫా ప్రపంచకప్ 2026 గ్రూప్-కె విభాగంలో సంచలనంనమోదైంది. హూస్టన్‌లో జరిగిన ఓ ఉత్కంఠభరితమైన మ్యాచ్‌లో టైటిల్ ఫేవరెట్‌గా బరిలోకి దిగిన పోర్చుగల్ జట్టు భారీ షాక్ తింది. పటిష్టమైన పోర్చుగల్‌ను డీఆర్ కాంగో జట్టు 1-1 గోల్స్‌తో డ్రాగా నిలువరించి సంచలనం సృష్టించింది. ఈ టోర్నమెంట్‌లో భారీ అంచనాలతో అడుగుపెట్టిన లెజెండరీ ఆటగాడు క్రిస్టియానో రొనాల్డోకు ఈ మొదటి మ్యాచ్ తీవ్ర నిరాశనే మిగిల్చింది. మైదానంలో ఏమాత్రం ప్రభావం చూపలేకపోయిన రొనాల్డో.. జట్టుకు విజయాన్ని అందించడంలో విఫలమయ్యాడు.

కోచ్ రాబర్టో మార్టినెజ్ మార్గదర్శకత్వంలో బరిలోకి దిగిన పోర్చుగల్ జట్టు మొదట్లో ఎంతో ఉత్సాహంగా మ్యాచ్‌ను ఆరంభించింది. యువ మిడ్‌ఫీల్డర్ జోవావో నెవెస్ ఆట ప్రారంభ నిమిషాల్లోనే అద్భుతమైన గోల్ కొట్టి జట్టుకు అనూహ్య ఆధిక్యాన్ని అందించాడు. దీంతో పోర్చుగల్ చాలా సులభంగానే ఈ ఏకపక్ష మ్యాచ్‌ను గెలుస్తుందని అభిమానులు భావించారు. అయితే హాఫ్ టైమ్ ముగియడానికి కొద్ది నిమిషాల ముందు డీఆర్ కాంగో స్టార్ ప్లేయర్ యోన్ విస్సా ఒక అద్భుతమైన ఫీల్డ్ గోల్ సాధించడంతో స్కోరు 1-1తో సమానమైంది. ఆ తర్వాత పోర్చుగల్ ఎంత ప్రయత్నించినా ప్రత్యర్థి డిఫెన్స్‌ను చేధించలేకపోయింది.

రొనాల్డో పేలవ ప్రదర్శన.. రికార్డుకు బ్రేక్

41 ఏళ్ల వయసులో బరిలోకి దిగిన క్రిస్టియానో రొనాల్డోకు ఈ మ్యాచ్ ఓ తీవ్రమైన అసంతృప్తిని మిగిల్చింది. మైదానంలో బంతిపై పట్టు సాధించడానికి ఆయన తీవ్రంగా శ్రమించాల్సి వచ్చింది. పూర్తి మ్యాచ్‌లో కేవలం 25 సార్లు మాత్రమే రొనాల్డో బంతిని టచ్ చేయగలిగాడు. అంటే రొనాల్డో ఆటతీరు ఏ స్థాయిలో సాగిందో అర్థం చేసుకోవచ్చు. ఈ మ్యాచ్‌తో కలిపి అంతర్జాతీయ టోర్నమెంట్లలో వరుసగా గత 10 ఇన్నింగ్స్‌లుగా రొనాల్డో ఒక్క గోల్ కూడా చేయలేదు. ఆరు ప్రపంచకప్‌లలో గోల్స్ సాధించిన రికార్డు సృష్టించాలన్న రొనాల్డో ఆశయం కోసం ఫ్యాన్స్ మరికొంత కాలం వేచి చూడాల్సిందే.

ఆట అనంతరం మైదానంలో ఊహించని భావోద్వేగ సంఘటనలు చోటుచేసుకున్నాయి. డీఆర్ కాంగో జట్టు అభిమానులు స్టేడియం వీడుతున్న రొనాల్డోను గేలి చేస్తూ 'మెస్సీ.. మెస్సీ..’ అంటూ నినాదాలతో హోరెత్తించారు. అయినప్పటికీ రొనాల్డో ఎంతో సంయమనం పాటిస్తూ ఎటువంటి అసహనం చూపకుండా ప్రశాంతంగా టన్నెల్ వైపు నడిచి వెళ్లారు. అదే సమయంలో భద్రతా వలయాన్ని దాటుకుని మైదానంలోకి ప్రవేశించిన ఓ యువ అభిమానిని ఆత్మీయంగా హత్తుకుని, సెల్ఫీకి అనుమతి ఇచ్చి అక్కడ ఉన్న వారందరి మనసులను గెలుచుకున్నారు.

మెస్సీతో మళ్లీ పోలికలు.. పోర్చుగల్ తదుపరి సవాలు

విచిత్రంగా రొనాల్డో మొదటి మ్యాచ్‌లో విఫలమవడానికి ఒక్కరోజు ముందే అర్జెంటీనా కెప్టెన్ లియోనెల్ మెస్సీ అల్జీరియాపై అద్భుతమైన హ్యాట్రిక్ గోల్స్ చేసి ఫామ్ చాటుకున్నాడు. 2022 ఖతార్ ప్రపంచకప్‌లో మెస్సీ చాంపియన్‌గా నిలవగా.. రొనాల్డో సైడ్ బెంచ్‌కే పరిమితమైన విషయం తెలిసిందే. ఇప్పుడు మళ్లీ ఈ ఇద్దరు దిగ్గజాల భిన్నమైన ప్రదర్శనలు లీగ్ ప్రారంభంలోనే అభిమానుల మధ్య రసవత్తరమైన చర్చకు కారణమయ్యాయి. పోర్చుగల్ తన తదుపరి మ్యాచ్‌లో బరిలోకి దిగనున్న ఉజ్బెకిస్తాన్‌తో తలపడనుంది. ఈ మ్యాచ్‌లోనైనా పోర్చుగల్ విజయం సాధించి, రొనాల్డో తిరిగి లయ అందుకుంటారని సాకర్ లవర్స్ ఆశిస్తున్నారు.