FIFA World Cup 2026: సెమీఫైనల్లోకి ఇంగ్లాండ్.. నార్వే ఔట్!

FIFA World Cup 2026: ఫిఫా ప్రపంచ కప్ 2026 క్వార్టర్ ఫైనల్స్‌లో భాగంగా జరిగిన ఉత్కంఠభరిత పోరులో నార్వేను 2-1 తేడాతో ఓడించి ఇంగ్లండ్ సెమీఫైనల్స్‌కు స్థానం సంపాదించింది. సెమీస్‌లో అర్జెంటీనా లేదా స్విట్జర్లాండ్ జట్టుతో ఆడే అవకాశం ఉంది. ఈ కీలక మ్యాచ్‌లో నిర్ణీత 90 నిమిషాల పాటు ఇరు జట్లు 1-1తో సమంగా నిలవడంతో మ్యాచ్ అదనపు సమయానికి దారితీసింది. జూడ్ బెల్లింగ్‌హామ్ తన రెండో గోల్ చేసి ఇంగ్లండ్‌కు అద్భుతమైన విజయాన్ని అందించాడు. నార్వే టోర్నమెంట్ అంతటా అద్భుతంగా ఆడి క్వార్టర్ ఫైనల్స్‌కు చేరుకుంది. ఎర్లింగ్ హాలాండ్ 7 గోల్స్ చేసి ప్రభావవంతమైన స్ట్రైకర్లలో ఒకడిగా నిలిచాడు. కానీ చివరికి ఇంగ్లండ్ అనుభవం, వారి కీలక ఆటగాళ్ల ఆటతీరు ముందు నార్వే తల వంచాల్సి వచ్చింది.

మొదటి భాగంలో సమానంగా..
ఆట ప్రారంభ నిమిషాల్లో నార్వే ఇంగ్లండ్ జట్టుపై కాస్త ఒత్తిడిని పెంచింది. 36వ నిమిషంలో నార్వే ఆటగాడు ఆండ్రియాస్ షెల్డెరుప్ అద్భుతమైన ఫినిషింగ్‌తో గోల్ చేసి తన జట్టుకు 1-0 ఆధిక్యాన్ని అందించడంతో వారి ప్రయత్నం ఫలించింది. మొదటి అర్ధభాగంలో నార్వే డిఫెన్స్ కూడా బలంగా కనిపించి.. ఇంగ్లాండ్ దాడులను తిప్పికొట్టింది. అయితే మొదటి అర్ధభాగం అదనపు సమయంలో స్కోరును సమం చేయడానికి ఇంగ్లాండ్‌కు ఓ అవకాశం లభించింది. 45వ నిమిషంలో ఆంథోనీ గోర్డాన్ నుంచి పాస్ అందుకున్న జూడ్ బెల్లింగ్‌హామ్ ఎలాంటి పొరపాటు చేయకుండా స్కోరును 1-1తో సమం చేశాడు.

అదనపు సమయంలో గెలిచిన ఇంగ్లాండ్
రెండో భాగంలో ఇరు జట్లు విన్నింగ్ గోల్ కోసం తీవ్రంగా ప్రయత్నించాయి. ఇంగ్లాండ్ ఎక్కువసేవు బంతిని తమ ఆధీనంలో ఉంచుకోగా.. నార్వే ఎదురుదాడి ద్వారా అవకాశాలను సృష్టించుకున్నా విఫలమైంది. ఇరు జట్ల గోల్ కీపర్లు అద్భుతమైన సేవ్స్ చేసి.. 90 నిమిషాల పాటు ఏ జట్టు కూడా ఆధిక్యం సాధించకుండా అడ్డుకున్నారు. ఆ తర్వాత మ్యాచ్ అదనపు సమయానికి దారితీసింది. అదనపు సమయంలో ఇంగ్లాండ్ తమ అనుభవాన్ని ప్రదర్శించింది. 93వ నిమిషంలో జూడ్ బెల్లింగ్‌హామ్ ఓ అద్భుతమైన గోల్‌తో మరోసారి తన ప్రతిభను నిరూపించుకున్నాడు, అదే చివరికి నిర్ణయాత్మకంగా నిలిచింది. తర్వాత నార్వే సమం చేయడానికి ప్రయత్నించినా ఫలితం లేకపోయింది.

ఇంగ్లాండ్ ఇలా ముందుకు సాగింది?
మ్యాచ్ గణాంకాలు కూడా ఇంగ్లాండ్‌కు అనుకూలంగా ఉన్నాయి. ఆ జట్టు మొత్తం 14 షాట్లు కొట్టగా.. వాటిలో ఎనిమిది లక్ష్యాన్ని చేరాయి. కాగా నార్వే తమ 13 షాట్లలో కేవలం ఐదింటిని మాత్రమే లక్ష్యాన్ని చేరగలిగింది. ఇంగ్లాండ్ 53 శాతం బంతిని తమ ఆధీనంలో ఉంచుకుని, 91 శాతం పాసింగ్ కచ్చితత్వంతో 606 పాస్‌లను పూర్తి చేసింది. ఈ టోర్నమెంట్‌లో నార్వే ప్రయాణం ముగిసి ఉండవచ్చు, కానీ వారి ప్రదర్శన ఫుట్‌బాల్ అభిమానుల హృదయాలలో, మనస్సులలో చెరగని ముద్ర వేసింది.