FIFA WC 2026: 40 ఏళ్లలో తొలిసారి.. జర్మనీని ఓడించిన జట్టుకు మెక్సికో బిగ్ షాక్!

FIFA WC 2026: ఫిఫా వరల్డ్ కప్ 2026లో మెక్సికో ఫుట్‌బాల్ జట్టు సరికొత్త చరిత్ర సృష్టించింది. రౌండ్ ఆఫ్ 32 నాకౌట్ పోరులో ఈక్వెడార్ జట్టును 2-0 తేడాతో ఘోరంగా ఓడించి.. ఏకంగా 40 ఏళ్ల తర్వాత ప్రపంచ కప్ నాకౌట్ దశలో మెక్సికో తన మొదటి విజయాన్ని నమోదు చేసింది. ఈ హిస్టారికల్ విక్టరీతో స్టేడియంలోని వేలాది మంది అభిమానులు సంబరాల్లో మునిగిపోయారు. ఈ గెలుపుతో మెక్సికో జట్టు ప్రీ-క్వార్టర్ ఫైనల్స్‌కు (రౌండ్ ఆఫ్ 16) అర్హత సాధించగా.. టోర్నీలో జర్మనీ వంటి బలమైన జట్టును ఓడించి సంచలనం సృష్టించిన ఈక్వెడార్ ప్రయాణం ఇక్కడితో ముగిసింది.

ఫస్టాఫ్‌లోనే మెక్సికో గోల్స్ వేట
మ్యాచ్ ప్రారంభమైన మొదటి హాఫ్‌లోనే మెక్సికో జట్టు ఆటపై పూర్తి కంట్రోల్ సాధించింది. దూకుడుగా ఆడుతూ కేవలం 9 నిమిషాల వ్యవధిలోన రెండు అద్భుతమైన గోల్స్ చేసి ఈక్వెడార్‌ను డిఫెన్స్‌లో పడేసింది. మ్యాచ్ 22వ నిమిషంలో జూలియన్ క్విరోనెస్ అద్భుత గోల్‌తో మెక్సికోకు మొదటి ఆధిక్యాన్ని అందించాడు. ఈ టోర్నీలో అతనికి ఇది మూడో గోల్ కావడం విశేషం. ఆ తర్వాత కొద్దిసేపటికే 31వ నిమిషంలో స్టార్ ప్లేయర్ రౌల్ జిమెనెజ్ మరో సూపర్ స్ట్రైక్‌తో జట్టు ఆధిక్యాన్ని 2-0కి పెంచాడు. జిమెనెజ్ అంతర్జాతీయ కెరీర్లో ఇది 47వ గోల్ కాగా.. మెక్సికో దేశం తరఫున అత్యధిక గోల్స్ చేసిన ఆటగాళ్ల జాబితాలో అతను రెండో స్థానానికి చేరుకున్నాడు.

1986 తర్వాత మళ్లీ ఇప్పుడే..
మెక్సికో సాధించిన ఈ విజయం గత చరిత్రను మరోసారి గుర్తుకు తెచ్చింది. గతంలో 1986లో మెక్సికో ప్రపంచ కప్‌కు ఆతిథ్యం ఇచ్చినప్పుడు ఇదే మైదానంలో బల్గేరియాను 2-0తో ఓడించి చివరిసారిగా నాకౌట్ మ్యాచ్ గెలిచింది. ఈసారి 48 జట్లతో కూడిన కొత్త ఫార్మాట్ కారణంగా మెక్సికో నేరుగా క్వార్టర్ ఫైనల్‌కు చేరుకోనప్పటికీ.. గత 7 ప్రపంచకప్‌ల నుంచి వరుసగా మొదటి నాకౌట్ మ్యాచ్‌లోనే ఓడిపోతున్న శాపాన్ని బద్ధలు కొట్టడం ఆ జట్టుకు పెద్ద పండగ లాంటిదేనని చెప్పాలి.

10 మంది ఆటగాళ్లతోనే ముగించిన ఈక్వెడార్
మ్యాచ్ ముగిసే సమయానికి ఈక్వెడార్ కష్టాలు మరింత రెట్టింపయ్యాయి. ఆ జట్టు డిఫెండర్ పియరో హింకాపి, ప్రత్యర్థి జట్టు ఆటగాడిని నోటితో దూషిస్తూ ముఖంపై చేతితో నెట్టడంతో అంపైర్ అతనికి నేరుగా 'రెడ్ కార్డ్' చూపించి మైదానం బయటకు పంపేశాడు. దీంతో మ్యాచ్ చివరి నిమిషాల్లో ఈక్వెడార్ జట్టు కేవలం 10 మంది ఆటగాళ్లతోనే ఆడాల్సి వచ్చింది. మెక్సికో డిఫెన్స్‌ను ఛేదించడంలో ఈక్వెడార్ ఘోరంగా విఫలం కావడంతో టోర్నమెంట్ నుండి నిష్క్రమించక తప్పలేదు.