వరల్డ్ కప్‌లో పసికూన సంచలనం.. ఈక్వెడార్‌కు తప్పని భంగపాటు!

ఫిఫా ప్రపంచకప్ టోర్నీలో సరికొత్త సంచలనం నమోదైంది. టోర్నమెంట్ లో తొలిసారి అడుగుపెట్టిన పసికూన క్యూరాసావ్ జట్టు బలమైన ఈక్వెడార్ జట్టును నిలువరించి మెగా టోర్నీ చరిత్రలోని తన మొట్టమొదటి ప్రపంచ కప్ పాయింట్‌ను తన ఖాతాలో వేసుకుంది. కాన్సాస్ సిటీ స్టేడియంలో జరిగిన గ్రూప్-ఈ ఉత్కంఠభరిత పోరులో క్యూరాసావ్ 0-0తో ఈక్వెడార్ జట్టుపై మ్యాచ్‌ను డ్రా చేసుకుంది. క్యూరాసావ్ గోల్‌కీపర్ ఎలోయ్ రూమ్ ఆకాశమే హద్దుగా చెలరేగి ఏకంగా 15 సార్లు గోల్ సేవ్ చేయడంతో ఈక్వెడార్ జట్టుకు తీవ్ర నిరాశే మిగిలింది. ఈ ఫలితంతో గ్రూప్-ఈలో ఐవరీ‌కోస్ట్‌పై విజయం సాధించిన జర్మనీ జట్టు అగ్రస్థానాన్ని ఖరారు చేసుకుంది.

తొలి నిమిషం నుంచి ఈక్వెడార్ జోరు.. అడ్డుగోడలా నిలిచిన రూమ్
మ్యాచ్ ప్రారంభమైన మూడో నిమిషం నుంచే ఈక్వెడార్ జట్టు మ్యాచ్‌పై పట్టు సాధించేందుకు ప్రయత్నించింది. మోయిసెస్ కైసెడో అందించిన పాస్‌ను అందుకుని ఈక్వెడార్ స్టార్ ప్లేయర్ ఎన్నర్ వాలెన్సియా కొట్టిన బలమైన షాట్ ను క్యూరాసావ్ కీపర్ ఎలోయ్ రూమ్ అద్భుత డైవ్‌తో తిప్పికొట్టాడు. ఆ తర్వాత కూడా ఈక్వెడార్ ఫార్వర్డ్ ఆటగాళ్లు జాన్ యెబోవా, పీరో హింకాపియే సృష్టించిన అవకాశాలను రూమ్ ఒక్కడే ఒంటిచేత్తో అడ్డుకున్నాడు. హాఫ్ టైమ్ ముగిసే సమయానికి ఈక్వెడార్ ఎన్ని సార్లు ప్రయత్నించినా క్యూరాసావ్ డిఫెన్ల్ విభాగాన్ని, ముఖ్యంగా కీపర్ రూమ్‌ను దాటలేకపోయాయి.

చివరి నిమిషం వరకు ఉత్కంఠ.. క్యూరాసావ్ ఎదురుదాడి
తర్వాత కూడా ఈక్వెడార్ ఒత్తిడిని మరింతగా పెంచేసింది. గొంజాల్లో ప్లాటా హెడర్‌ను రూమ్ అడ్డుకున్న తరుణంలో, క్యూరాసావ్ జట్టుకు లభించిన ఎదురుదాడి అవకాశాన్ని ఈక్వెడార్ కీపర్ హెర్నాన్ గాలిండెజ్ సమర్థవంతంగా అడ్డుకున్నాడు. క్యూరాసావ్ ఆటగాళ్లు లివానో కొమెనెంసియా, లియాండ్రో బాకునా వేసిన షాట్లను గాలిండెజ్ కాపాడాడు. మ్యాచ్ ముగిసే సమయానికి పెడ్రో విటే కొట్టిన షాట్‌ను రూమ్ గాల్లోకి ఎగిరి అడ్డుకోగా.. 90వ నిమిషంలో ఆంజెలో ప్రెసియాడో కొట్టిన బంతి గోల్ పోస్ట్ పైభాగానికి తగిలి వెనక్కి రావడంతో ఈక్వెడార్ దురదృష్టం స్పష్టమైంది. మ్యాచ్ ముగిసే సరికి స్కోరు 0-0గా నిలవడంతో క్యూరాసావ్ అభిమానులు మైదానంలో పండుగ చేసుకున్నారు.

వరల్డ్ రికార్డును సమం చేసిన రూమ్
ఈ ఉత్కంఠభరిత పోరులో ఎలోయ్ రూమ్ చేసిన 15 సేవ్స్ ప్రపంచకప్ చరిత్రలోనే ఒకే మ్యాచ్‌లో అత్యధిక సేవ్స్ చేసిన రికార్డును సమం చేశాయి. అంతకుముందు 2014 ప్రపంచకప్‌లో బెల్జియంపై అమెరికా కీపర్ టిమ్ హోవార్డ్ మాత్రమే ఈ ఘనత సాధించాడు. కాగా ఈక్వెడార్ జట్టు దురదృష్టం ఈ మ్యాచ్‌లోనూ కొనసాగింది. వారు గోల్ కోసం చేసిన 27 ప్రయత్నాలలో 15 షాట్లు నేరుగా టార్గెట్‌పైకే వెళ్లినప్పటికీ ఒక్క గోల్ కూడా సాధించలేకపోయారు. ఎక్స్‌పెక్టెడ్ గోల్స్ గణాంకాల ప్రకారం ఈక్వెడార్ రేటింగ్ 3.05 కాగా, క్యూరాసావ్ కేవలం 0.48 మాత్రమే కావడం విశేషం. జర్మనీ చేతిలో ఘోర పరాజయం పాలైన క్యూరాసావ్ ఈ మ్యాచ్‌తో పుంజుకోగా.. ఈక్వెడార్ తదుపరి రౌండ్‌కు చేరాలంటే తమ చివరి గ్రూప్ మ్యాచ్‌లో జర్మనీని తప్పక ఓడించాల్సిన పరిస్థితి ఏర్పడింది.