అర్జెంటీనాదే కప్పు: 'ఆ భావోద్వేగ క్షణాలను మెస్సీ ఆస్వాదించాలి'

టైటిల్ ఫేవరేట్లలో అర్జెంటీనా ఒకటి

ప్రస్తుతం రష్యా వేదికగా జరుగుతున్న వరల్డ్ కప్‌లో టైటిల్ ఫేవరేట్లలో అర్జెంటీనా జట్టు కూడా ఒకటి. 2014లో బ్రెజిల్ వేదికగా జరిగిన వరల్డ్ కప్ ఫైనల్లో జర్మనీ చేతిలో అర్జెంటీనా ఓటమి పాలైన సంగతి తెలిసిందే. ఆ తర్వాత జరిగిన 2015, 2016 కోపా అమెరికా టోర్నీ ఫైనల్స్‌లోనూ అర్జెంటీనా ఓడిపోయింది.

అర్జెంటీనాను మెస్సీ విజేతగా నిలుపుతాడు

అయితే, వాటికి సంబంధం లేకుండా ఈ ఫిఫా వరల్డ్ కప్‌లో అర్జెంటీనాను మెస్సీ విజేతగా నిలుపుతాడని చెప్పాడు. తద్వారా 32 ఏళ్ల వరల్డ్ కప్ నిరీక్షణకు మెస్సీ ఈసారి ముగింపు పలుకుతాడని మారడోనా ధీమా వ్యక్తం చేశాడు. ఈ సందర్భంగా మారడోనా మాట్లాడుతూ "ఈ సారి అర్జెంటీనా కప్‌ గెలుస్తుంది" అని చెప్పాడు.

నేనేమీ అంచనాలు వేయడం లేదు

"ఇది చెప్పడానికి నేనేమీ అంచనాలు వేయడం లేదు. మెస్సీ వరల్డ్‌కప్‌ గెలిచి తన గొప్పతనాన్ని నిరూపించుకోవాల్సిన అవసరం లేదు. కానీ, ఈసారి మాత్రం మెస్సీ వరల్డ్ కప్‌ గెలవాలని బలంగా కోరుకుంటున్నాడు. అదే అర్జెంటీనా జట్టుకు ప్రధాన బలం. క్షణాల్లో మ్యాచ్‌ దిశను మలుపు తిప్పగల సత్తా అతనిలో ఉంది" అని అన్నాడు.

ఆ భావోద్వేగ క్షణాల గురించి వర్ణించడం చాలా కష్టం

"ప్రపంచకప్‌ గెలిచిన తర్వాత అప్పటి భావోద్వేగ క్షణాల గురించి వర్ణించడం చాలా కష్టం. వాటిని మెస్సీ కూడా తప్పకుండా అనుభవించాలని కోరుకుంటున్నా" అని మారడోనా ఈ వ్యాసంలో రాసుకొచ్చాడు. టోర్నీలో భాగంగా గ్రూపు-డిలో ఉన్న అర్జెంటీనా శనివారం తొలి మ్యాచ్‌లో ఐస్‌లాండ్‌తో తలపడనుంది.