చిలీని చిత్తు చేసిన బ్రెజిల్

జొహానెస్‌ బర్గ్‌: బ్రెజిల్‌ ప్రపంచకప్‌ క్వార్టర్‌ఫైనల్లోకి దూసుకెళ్లింది. సోమవారం రాత్రి ఏకపక్షంగా సాగిన మ్యాచ్‌లో 3-0తో చిలీని చిత్తు చేసింది. జువాన్‌ (35వ నిమిషం), ఫాబియానో (38వ), రాబిన్హో (59వ) గోల్స్‌ చేశారు. మ్యాచ్‌ ఆరంభంలో తప్పితే చిలీ..బ్రెజిల్‌కు ఏ దశలోనూ పోటీనివ్వలేదు. మూడు నిమిషాల వ్యవధిలో బ్రెజిల్‌ రెండు గోల్స్‌తో చిలీని కోలుకోలేని దెబ్బతీసింది. 35వ నిమిషంలో మైకాన్‌ కార్నర్‌ కిక్‌ కొట్టగా..జువాన్‌ అద్భుత రీతిలో బంతిని తలతో గోల్‌ చేశాడు.

వెంటనే మరో గోల్‌. ఈసారి మంచి సమన్వయంతో కదిలిన రాబిన్హో, కాక..బంతిని ఫాబియానోకు అందించగా, అతడు గోల్‌కీపర్‌ను బోల్తా కొట్టించి అలవోకగా గోల్‌ చేశాడు. ప్రథమార్ధం ముగిసేసరికి బ్రెజిల్‌ 2-0 ఆధిక్యంలో నిలిచింది. ద్వితీయార్ధంలో జోరు కొనసాగించిన ఆ జట్టు 59వ నిమిషంలో 3-0 ఆధిక్యంలోకి దూసుకెళ్లింది. రమిరెస్‌ మైదానం సగం నుంచి బంతిని నెట్టుకుంటూ పెనాల్టీ ప్రాంతంలోని రాబిన్హోకు అందించగా అతడు కళ్లుచెదిరే గోల్‌ చేశాడు. ఆధిక్యాన్ని తగ్గించేందుకు చిలీ పోరాడినా ఫలితం లేకపోయింది.