ప్రపంచ ట్వంటీ 20కి జహీర్ డౌట్

ముంబయి‌: ఐసిసి ట్వంటీ 20 ప్రపంచ కప్ పోటీల్లో భారత ఫాస్ట్ బౌలర్ జహీర్ ఖాన్ ఆడడం అనుమానంగానే ఉంది. ఇటీవలే ముగిసిన ఐపియల్ పోటీల్లో అతను ముంబయి ఇండియన్స్ కు ప్రాతినిధ్యం వహించాడు. రాయల్ చాలెంజర్స్ తో ఈ నెల 3వ తేదీన జరిగిన మ్యాచులో అతని భుజానికి గాయమైంది. దాని తర్వాత జరిగిన మ్యాచులో అతను ఆడలేకపోయాడు.

ముంబయి ఇండియన్స్ జట్టు సభ్యులందరూ భారత్ కు తిరిగి వచ్చారు. అయితే జహీర్ ఖాన్ మాత్రం దక్షిణాఫ్రికాలోనే ఉండిపోయాడు. దక్షిణాఫ్రికా వైద్యుడి వద్ద జహీర్ చికిత్స పొందుతున్నాడని, దానికి సంబంధించిన వివరాలను బిసిసిఐ వెల్లడిస్తుందని, అతను కోలుకోగలడని, జూన్ 5వ తేదీన బంగ్లాదేశ్ తో జరిగే తొలి మ్యాచులో ఆడగలడని ఆశిస్తున్నామని ముంబయి ఇండియన్స్ జట్టు సభ్యుడొకతను చెప్పాడు.