చహల్‌.. నేను పక్కన లేనంత వరకే నీ ఆటలు: ధనశ్రీ

డివిలియర్స్‌తో కలిసి షూటింగ్:

ఐపీఎల్ 2020‌లో రాయల్‌ ఛాలెంజర్స్‌ బెంగళూరు తరఫున ఆడుతున్న యజువేంద్ర చహల్ మైదానంలో విపరీతంగా సాధన చేస్తున్నాడు. జట్టు సభ్యులను అలరిస్తూ.. సమయాన్ని సరదాగా గడుపుతున్నాడు. మరోవైపు టీవీ షూటింగుల్లోనూ యూజీ పాల్గొంటున్నాడు. ఈ క్రమంలో బెంగళూరు స్టార్ ఆటగాడు ఏబీ డివిలియర్స్‌తో కలిసి షూటింగ్‌లో పాల్గొన్న ఓ వీడియోను తాజాగా అతడు సోషల్ మీడియాలో పంచుకున్నాడు. వీడియోలో యూజీ ఓ వీల్‌ఛైర్‌పై కూర్చొన్నాడు. అతడిని డివిలియర్స్ అటు ఇటూ తిప్పుతున్నాడు. వీడియోకియూజీ 'టేక్‌ మీ హోమ్‌' అనే కాప్షన్ పెట్టాడు.

నేను నీ పక్కన లేనంత వరకే:

యజువేంద్ర చహల్ పోస్ట్ చేసిన వీడియోను ఆయనకు కాబోయే సతీమణి ధనశ్రీ వర్మ చూసారు. వెంటనే తనదైన శైలిలో స్పందించారు. 'నేను నీ పక్కన లేనంత వరకే సేదతీరు.. ఇక నీ ఆటలు న దగ్గర సాగవ్' అని ధనశ్రీ వర్మ పంచ్‌ విసిరారు. ప్రస్తుతం ఈ కామెంట్ నెట్టింట వైరల్ అయింది. దానికి నెటిజన్లు మొత్తం నవ్వుతున్న ఏమోజీలు పెట్టారు. చివరికి చహల్‌ కూడా 'అవును' అని కామెంట్ పెట్టాడు. ఆగష్టు రెండో వారంలో చహల్, ధనశ్రీల నిశ్చితార్ధం జరిగిన విషయం తెలిసిందే.

యూట్యూబ్‌ స్టార్‌:

ముంబైకి చెందిన ధనశ్రీ వర్మ ఓ డెంటిస్ట్‌. 2014లోనే ఆమె నవీ ముంబయిలోని డీవై పాటిల్‌ డెంటల్‌ కళాశాల నుంచి డిగ్రీ పొందారు. అయితే కొరియోగ్రఫీ అంటేనే ధనశ్రీకి ఎక్కువ ఇష్టం. ఆమెకు ధనశ్రీ వర్మ పేరిట ఓ డ్యాన్స్‌ అకాడమీ కూడా ఉంది. ఆమె సొంత యూట్యూబ్‌ ఛానెల్‌కు 15 లక్షల మందికి పైగా సబ్‌స్కైబర్లు ఉన్నారు. ఇన్‌స్టాలో 5 లక్షల మందికిగా పైగా అనుసరిస్తున్నారు. చహల్‌తో నిశ్చితార్థం అయినట్టు పెట్టిన ఇన్‌స్టా పోస్టుకు 2 లక్షకు పైగా లైకులు వచ్చాయి. కరోనా వైరస్ లాక్​డౌన్ సమయంలో జూమ్​ వర్క్​షాప్​ల్లో చహల్​-ధనశ్రీకి పరిచయం ఏర్పడినట్టు సమాచారం. ధనశ్రీ వర్మ వృత్తిపరంగా వైద్యురాలే అయినప్పటికీ.. ఆమె యూట్యూబ్‌ స్టార్‌గానే ఎక్కువ మందికి పరిచయం. ఆమె కొరియోగ్రఫీ చేసిన కొన్ని వీడియోలకు లక్షల కొద్ది వ్యూస్‌ వస్తున్నాయి.