యువీ, ధోనీ సెక్యూరిటీ ప్రోటోకాల్ ఉల్లంఘన

చండీఘర్: తాము ఉంటున్న హోటల్ నుంచి చెప్పాపెట్టకుండా భారత క్రికెట్ ఆటగాళ్లు బయటకు వెళ్లిపోతుండడంపై చండీఘర్ పోలీసుూలు పంజాబ్ క్రికెట్ సంఘానికి ఫిర్యాదు చేశారు. తొలుత యువరాజ్ సింగ్ సెక్యూరిటీ హద్దులను దాటి రాత్రి ఏడున్నర సమయంలో తాజ్ హోటల్ నుంచి బయటకు వచ్చి మిత్రుల కారులో ఉడాయించాడని, ఆ తర్వాత హర్భజన్ సింగ్, ధోనీ ఎవరికీ చెప్పకుండా వెళ్లిపోయారని పోలీసు సూపరింటిండెంట్ హెచ్ఎస్ డూన్ మీడియా ప్రతినిధులతో చెప్పారు.

ఆటగాళ్ల బాధ్యతలు చూస్తున్న డిప్యూటీ పోలీసు సూపరింటిండెంట్ రోశన్ లాల్ తనకు ఈ విషయం చెప్పినట్లు ఆయన తెలిపారు. క్రీడాకారులపై చర్యలు తీసుకోవాలని కోరుతూ ఆ నివేదిక అధారంగా పంజాబ్ క్రికెట్ సంఘానికి లేఖ రాసినట్లు ఆయన చెప్పారు. క్రీడాకారులకు పూర్తి భద్రత కల్పించాలంటే వారి సహకారం అవసరమని, అటువంటి సంఘటనలు తమకు కష్టాలు తెచ్చిపెడతాయని అన్నారు.