క్రికెట్ కోసమే కుటుంబాన్ని నాశనం చేశా: యోగరాజ్ సింగ్ సంచలనం!

భారత క్రికెట్ దిగ్గజాలలో ఒకరైన యువరాజ్ సింగ్‌ను తీర్చిదిద్ధడంలో ఆయన తండ్రి యోగరాజ్ సింగ్ పాత్ర ఎంతో కీలకంగా నిలిచాడు. అయితే మాజీ క్రికెటర్ యోగరాజ్ సింగ్ తాజాగా ఇచ్చిన ఓ ఇంటర్వ్యూలో.. తన కుమారుడు యువరాజ్ సింగ్‌ను ప్రపంచంలోనే అత్యుత్తమ క్రికెటర్‌గా చూడాలనే తనకున్న అంతులేని కోరిక వల్ల తన వ్యక్తిగత జీవితంపై పడిన ప్రభావం గురించి వెల్లడించారు. ఈ క్రమంలో తాను తన మొదటి భార్య షబ్నమ్‌పై కఠినమైన నియమాలను విధించానని.. దాని కారణంగా తన కుటుంబం తన నుంచి దూరం అయిందని.. ప్రజలు తనను పిచ్చివాడని కూడా పిలిచారని ఆయన అంగీకరించారు.

ఆ కఠినత్వమే కుటుంబాన్ని నాశనం చేసింది..
తాను తన భార్యపై కఠినమైన నిబంధనలు అమలు చేశానని యోగరాజ్ సింగ్ ఓ ఇంటర్వ్యూలో వెల్లడించారు. తన ఈ కఠిన వైఖరి తనను కుటుంబం నుంచి దూరం చేసిందని.. తన వ్యక్తిగత సంబంధాలపై తీవ్ర ప్రభావం చూపిందని ఆయన అంగీకరించారు. యువరాజ్ ఆరోగ్యం గురించి తన భార్య అంతగా ఆందోళన చెందితే.. ఆమె తనను వదిలి వెళ్లిపోవచ్చని కూడా తాను అన్నట్లు యోగరాజ్ సింగ్ చెప్పారు. యువరాజ్ సింగ్ గురించి తన తల్లి కూడా ఆందోళన చెందేవారని.. తాను చనిపోయే ముందు బిడ్డను వదిలిపెట్టమని వేడుకున్నారని యోగరాజ్ సింగ్ వివరించారు.

తన కఠిన ప్రవర్తనను సమర్థించుకుంటూ.. తాను విదేశీ పాఠశాలలో చదువుకున్నానని, అక్కడ తనకు క్రమశిక్షణ నేర్పారని.. అదే క్రమశిక్షణను ఇతరులపై కూడా రుద్దామని యోగరాజ్ సింగ్ అన్నారు. ఇది తన భార్యతోనే మొదలైందని చెప్పారు. "నా అనుమతి లేకుండా నా భార్య ఇంటి నుంచి బయటకు వెళ్లడానికి అనుమతి లేదు. వారి కుటుంబ సభ్యులను నా ఇంట్లోకి అనుమతించేవాడిని కాదు, ఒకవేళ వచ్చినా, నాకు సలహాలు ఇవ్వడానికి అనుమతి ఉండేది కాదు" అని యోగరాజ్ సింగ్ వివరించారు.

ప్రతీకారం తీర్చుకోవాలనే భావన
యువరాజ్ సింగ్‌ను గొప్ప ఆటగాడిగా తీర్చిదిద్దాలనే తన కోరిక గురించి మాట్లాడుతూ.. "మాకు కొడుకు పుట్టినప్పుడు, నేను నా తల్లితో చెప్పాను, వాడిని గొప్ప ఆటగాడిగా తయారు చేయాలనే నిప్పు నాలో ఉంది. నా పట్ల అన్యాయం చేసిన వారందరిపై కపిల్ దేవ్‌తో సహా, నా కొడుకు ద్వారా ప్రతీకారం తీర్చుకుంటానని నేను ప్రమాణం చేశాను" అని యోగరాజ్ సింగ్ చెప్పారు. తన క్రికెట్ కెరీర్ గురించి అడిగినప్పుడు, తన కెరీర్ వైఫల్యం కారణంగా ముగియలేదని, తన పట్ల జరిగిన అన్యాయం కారణంగానే ముగిసిందని ఆయన అన్నారు. "నా పద్ధతి మాత్రమే సరైన పద్ధతి. నేను రాత్రి అంటే రాత్రే; నేను పగలు అంటే పగలే" అని ఆయన అన్నారు. తన కుటుంబం ఈ వైఖరిని బలహీనతగా భావించిందని, అయితే ఇది తనకు అంచును ఇచ్చిందని ఆయన నమ్ముతున్నారు.