WTC Final 2025: మార్‌క్రమ్, బవుమా కాదు.. దక్షిణాఫ్రికా విజయానికి నిజమైన హీరో అతడే!

WTC Final 2025: ఐసీసీ టోర్నమెంట్లలో పదే పదే నాకౌట్లలో ఓడిపోయిన తర్వాత దక్షిణాఫ్రికాను చోకర్స్ అని పిలుస్తారు. కానీ దక్షిణాఫ్రికా జట్టు ప్రపంచ టెస్ట్ ఛాంపియన్‌షిప్ 2025 ఫైనల్‌ను గెలుచుకోవడం ద్వారా ఆ మరకను తుడిచిపెట్టింది. దక్షిణాఫ్రికా చోకర్స్ అనే ట్యాగ్‌ను తొలగించడమే కాకుండా 27 ఏళ్ల కరువును కూడా తుడిచిపెట్టింది. దక్షిణాఫ్రికా డబ్ల్యూటీసీ ఫైన‌ల్‌లో ఆస్ట్రేలియాను ఎదుర్కొంది. నాలుగో ఇన్నింగ్స్‌లో దక్షిణాఫ్రికా 282 పరుగుల లక్ష్యాన్ని సాధించింది. అనంతరం లక్ష్యఛేదనలో ఐడెన్ మార్‌క్రమ్, టెంబా బవుమా పోరాడి జట్టును విజయతీరాలకు చేర్చారు.

దక్షిణాఫ్రికా ఈ విజయం కోసం ఐడెన్ మార్‌క్రమ్, టెంబా బవుమా ప్రశంసలు అందుకుంటున్నారు. కానీ ఐడెన్ మార్‌క్రమ్, టెంబా బవుమా కంటే ముందు జట్టు విజయానికి పునాది వేసిన ఆటగాడు దక్షిణాఫ్రికా జట్టులో ఉన్నాడు. అతనెవరో కాదు దక్షిణాఫ్రికా ఫాస్ట్ బౌలర్ కగిసో రబాడ. మార్‌క్రమ్, బవుమాతో పాటు రబాడ కూడా దక్షిణాఫ్రికా విజయానికి హీరోగా నిలిచాడు.

మ్యాచ్‌లో మొత్తం 9 వికెట్లు పడగొట్టిన రబాడ
ఆస్ట్రేలియాతో జరిగిన డబ్ల్యూటీసీ ఫైనల్‌లో కగిసో రబాడ మొదటి ఇన్నింగ్స్‌లోనే తన అద్భుత బౌలింగ్‌ను ప్రదర్శించాడు.రబాడ 15.4 ఓవర్లు బౌలింగ్ చేసి 51 పరుగులకు 5 వికెట్లు పడగొట్టాడు. రెండో ఇన్నింగ్స్‌లో కూడా తన బౌలింగ్‌తో కంగారూ జట్టుపై విధ్వంసం సృష్టించాడు. రెండో ఇన్నింగ్స్ లో రబాడ 18 ఓవర్లలో 59 పరుగులకు 4 వికెట్లు పడగొట్టాడు. ఈ విధంగా రబాడ రెండు ఇన్నింగ్స్‌లలో కలిపి మొత్తం 9 వికెట్లు పడగొట్టాడు. అయితే రెండో ఇన్నింగ్స్‌లో రబాడ 5 నో బాల్స్ కూడా బౌలింగ్ చేశాడు. దీని వల్ల ఆస్ట్రేలియాకు కొన్ని అవకాశాలు లభించాయి. కానీ ఈ విషయాలను పక్కన పెడితే రబాడ్ మొత్తం మ్యాచ్‌లో అద్భుతంగా బౌలింగ్ చేశాడు.

కగిసో రబాడ బలమైన బౌలింగ్ కారణంగా ఆస్ట్రేలియా జట్టు మొదటి ఇన్నింగ్స్‌లో కేవలం 212 పరుగులకే పరిమితమైంది. అయితే అనంతరం దక్షిణాఫ్రికా ప్రత్యేకంగా ఏమీ చేయలేకపోయింది. దక్షిణాఫ్రికా జట్టు కేవలం 138 పరుగులకే ఆలౌట్ అయింది. అటువంటి పరిస్థితిలో ఆస్ట్రేలియాకు 74 పరుగుల ఆధిక్యం లభించింది. కానీ మూడో ఇన్నింగ్స్‌లో బ్యాటింగ్‌కు దిగిన ఆస్ట్రేలియా జట్టు 207 పరుగులు మాత్రమే చేయగలిగింది. దీని కారణంగా దక్షిణాఫ్రికా గెలవడానికి 282 పరుగుల లక్ష్యాన్ని నిర్దేశించింది. మ్యాచ్ నాలుగో రోజున మార్‌క్రమ్ 136 పరుగులు, బవుమా 66 పరుగుల ఆధారంగా దక్షిణాఫ్రికా 5 వికెట్ల తేడాతో మ్యాచ్‌ను గెలుచుకుంది.