ఆర్సీబీ పని అయిపోయింది.. ముంబై, ఢిల్లీకి చావో రేవో?

WPL 2026: ఉమెన్స్ ప్రీమియర్ లీగ్(WPL) 2026 సీజన్ క్లైమాక్స్‌కు చేరుకుంది. స్మృతి మంధాన నేతృత్వంలోని రాయల్ ఛాలెంజర్స్ బెంగళూరు(ఆర్సీబీ) ఇప్పటికే అద్భుతంగా రాణించి నేరుగా ఫైనల్‌కు దూసుకెళ్లింది. ఆర్సీబీ ఇప్పటివరకు 8 మ్యాచ్‌లు ఆడి 6 మ్యాచుల్లో విజయం సాధించి 12 పాయింట్లతో పట్టికలో అగ్రస్థానంలో నిలిచింది. రెండో స్థానంలో గుజరాత్ జట్టు ఉండగా.. మూడో స్థానంలో ముంబై జట్టు ఉంది. లీగ్ దశలో మరో రెండు కీలక మ్యాచ్‌లు మిగిలి ఉండగా.. మిగిలిన రెండు ప్లేఆఫ్స్(ఎలిమినేటర్) స్థానాల కోసం ఢిల్లీ, ముంబై, గుజరాత్, యూపీ జట్ల మధ్య తీవ్ర పోటీ నెలకొంది.

ప్లేఆఫ్స్ రేసులో జట్ల సమీకరణాలు
డబ్ల్యూపీఎల్ నిబంధనల ప్రకారం.. పాయింట్ల పట్టికలో అగ్రస్థానంలో ఉన్న జట్టు నేరుగా ఫైనల్‌కు వెళ్తుంది. రెండు, మూడు స్థానాల్లో నిలిచిన జట్లు ఎలిమినేటర్ మ్యాచ్‌లో తలపడతాయి. అందులో గెలిచిన జట్టు ఫైనల్లో ఆర్సీబీతో తలపడుతుంది.

1. గుజరాత్ జెయింట్స్
గుజరాత్ జట్టు ప్లేఆఫ్స్ చేరడం దాదాపు ఖాయంగా కనిపిస్తోంది. శుక్రవారం (జనవరి 30) ముంబై ఇండియన్స్‌తో జరిగే మ్యాచ్‌లో గెలిస్తే, గుజరాత్ అధికారికంగా ప్లేఆఫ్స్ చేరుతుంది. ఒకవేళ ఓడిపోయినా.. చివరి మ్యాచ్‌లో యూపీ వారియర్స్ చేతిలో ఢిల్లీ క్యాపిటల్స్ ఓడిపోవాలని వారు కోరుకోవాల్సి ఉంటుంది.

2. ముంబై ఇండియన్స్
డిఫెండింగ్ ఛాంపియన్ ముంబైకి నేటి మ్యాచ్ చావో రేవో లాంటిది. గుజరాత్ జెయింట్స్‌పై విజయం సాధిస్తే ముంబై నేరుగా ప్లేఆఫ్స్‌కు అర్హత సాధిస్తుంది. ఒకవేళ ఓడిపోతే ఢిల్లీ క్యాపిటల్స్ కూడా తన చివరి మ్యాచ్‌లో ఓడిపోవాలి. అప్పుడు నెట్ రన్ రేట్ ఆధారంగా ముంబైకి అవకాశం ఉంటుంది.

3. ఢిల్లీ క్యాపిటల్స్
ఢిల్లీ జట్టు ప్లేఆఫ్స్ ఆశలు సజీవంగా ఉండాలంటే ఫిబ్రవరి 1న యూపీ వారియర్స్‌తో జరిగే మ్యాచ్‌లో తప్పక గెలవాలి. ముంబై, గుజరాత్ జట్లు తమ పాయింట్లను 8కి పెంచుకుంటే, ఢిల్లీ భారీ తేడాతో గెలిచి తన రన్ రేట్‌ను మెరుగుపరుచుకోవాలి.

4. యూపీ వారియర్స్
యూపీ జట్టుకు అవకాశాలు చాలా తక్కువగా ఉన్నాయి. వారు ముందుకు వెళ్లాలంటే అద్భుతం జరగాలి. తమ చివరి మ్యాచ్‌లో ఢిల్లీని భారీ తేడాతో ఓడించాలి. అదే సమయంలో గుజరాత్ జట్టు ముంబైని భారీ ఓటమికి గురిచేయాలి. అప్పుడు అందరూ 6 పాయింట్ల వద్ద నిలుస్తారు, నెట్ రన్ రేట్ మెరుగ్గా ఉంటేనే యూపీకి ఛాన్స్ ఉంటుంది.

ఆర్సీబీ ఇప్పటికే ఫైనల్ బెర్త్ ఖరారు చేసుకోవడంతో, ఇప్పుడు అందరి దృష్టి ఎలిమినేటర్ స్థానాలపైనే ఉంది. నేడు జరిగే ముంబై vs గుజరాత్ మ్యాచ్ ఈ సమీకరణాలను మార్చేయనుంది.