భార్య సాక్షి రావత్‌తో మహేంద్ర సింగ్ ధోనీ చెట్టాపట్టాల్

బెంగళూరు: టీమిండియా కెప్టెన్‌ మహేంద్ర సింగ్ ధోనీతో భార్య సాక్షి రావత్‌ కలిసి ఉండడం, కలిసి తిరగడంలో తప్పేమీ లేదు. కానీ ప్రపంచ కప్ పోటీ సమయంలో వారిద్దరు కలిసివుంటే అది నిబంధనలకు విరుద్ధమే. నిబంధనలను ఉల్లంఘించి వారిద్దరు చెట్టాపట్టాల్ వేసుకుని తిరిగారనేదే ఆరోపణ. ప్రపంచకప్‌ ముగిసేవరకు టీమ్‌ఇండియా ఆటగాళ్లు తమ భార్యలు లేదా స్నేహితురాళ్లను టీమ్‌ హోటల్‌కు తీసుకురాకూడదని బీసీసీఐ నిబంధనలు విధించిందట. ఐతే శనివారం నుంచి సోమవారం వరకు ధోనీ సతీమణి సాక్షి బెంగళూరులోనే ఉన్నట్లు సమాచారం. చిన్నస్వామి స్టేడియంలో మ్యాచ్‌ను ప్రత్యక్షంగా వీక్షించిన ఆమె టీమ్‌ హోటల్లో ధోనీతో కనిపించిందట.

టీమిండియా సభ్యులు బెంగళూర్‌లోని జాతీయ క్రికెట్ అకాడమీలో ప్రాక్టీస్ చేస్తున్నారు. ఈ నెల 6వ తేదీన ఐర్లాండ్‌తో మ్యాచుకు వారు సమాయత్తమవుతున్నారు. ఇంగ్లాండుతో మ్యాచును టై చేసుకున్న ధోనీ సేన లోపాలపై దృష్టి పెట్టి వాటిని నివారించేందుకు తగిన కసరత్తు చేస్తోంది. బౌలింగ్, ఫీల్డింగ్ లోపాలను సరిదిద్దుకునే ఆలోచనలు చేస్తోంది. ఈ స్థితిలో ధోనీ భార్యతో కలిసి ఉండడంపై విమర్శలు వినిపిస్తున్నాయి.