చేజేతులా ఓవర్‌త్రోపై కేన్! గుప్టిల్ రూపంలో కివీస్ జట్టుకు దరిద్రం శనిలా!

అసలేం జరిగిందంటే

ఇంగ్లాండ్ విజయానికి ఆఖరి ఓవర్‌ చివరి మూడు బంతులకు గాను 9 పరుగులు అవసరమయ్యాయి. అప్పుడు ట్రెంట్‌బౌల్ట్‌ బౌలింగ్‌ చేయగా బెన్‌స్టోక్స్ డీప్ మిడ్ వికెట్ దిశగా బాదాడు. రెండు ప‌రుగులు తీశాడు. రెండు ప‌రుగుల‌తోనే ఆగిపోవాల్సిన ప‌రిస్థితి అది. రెండో పరుగును కోసం ప్ర‌య‌త్నించిన స‌మ‌యంలో బెన్ స్టోక్స్ కీపర్ ఎండ్‌కు వెళ్తూ రనౌట్ నుంచి తప్పించుకోవ‌డానికి క్రీజులోకి డైవ్ చేశాడు.

బంతి స్టోక్స్‌కు తగిలి బౌండరీకి

న్యూజిలాండ్ ఫీల్డర్ నుంచి వచ్చిన బంతి స్టోక్స్‌కు తగిలి బౌండరీకి తరలింది. దీంతో ఆ బంతికి మొత్తం ఆరు పరుగులు వచ్చాయి. స్టోక్స్ మొద‌ట చేసిన రెండు ప‌రుగుల‌తో పాటు.. బంతి బౌండ‌రీని త‌గ‌ల‌డం వ‌ల్ల వ‌చ్చిన నాలుగు ప‌రుగుల‌ను ఇంగ్లండ్ ఖాతాలో వేశారు. ఆ ప‌రుగులే గ‌న‌క లేక‌పోయి ఉంటే- మ్యాచ్ న్యూజిలాండ్ వైపు మొగ్గు చూపించి ఉండేదే! కాగా తన బ్యాట్‌ వల్ల ఓవర్‌త్రో రావడంపై బెన్‌స్టోక్స్‌ తన తప్పేమీ లేదని, అది అనుకోకుండా జరిగిపోయిందని విలియమ్సన్‌ జట్టుకు క్షమాపణలు చెప్పాడు.

రెండు బంతులకు మూడు పరుగులు అవసరమైన

ఆ తర్వాత రెండు బంతులకు మూడు పరుగులు అవసరమైన స్థితిలో స్టోక్స్‌ మళ్లీ రెండు పరుగులకు ప్రయత్నించాడు. ఒక పరుగు పూర్తిచేసి రెండో పరుగుకు వెళ్తుండగా అదిల్‌రషీద్‌ రనౌటయ్యాడు. దీంతో చివరి బంతికి రెండు పరుగులు అవసరమయ్యాయి. స్టోక్స్‌ మళ్లీ రెండు పరుగులకు ప్రయత్నించగా ఈసారి మార్క్‌వుడ్‌ రెండో పరుగుకు రనౌటయ్యాడు.

సూపర్ ఓవర్ కూడా టై

దీంతో ఇంగ్లాండ్ కూడా నిర్ణీత 50 ఓవర్లలో 241 పరుగులే చేయడంతో మ్యాచ్ టైగా ముగిసింది. దీంతో మ్యాచ్ సూపర్ ఓవర్‌కు దారి తీసింది. ముందుగా బ్యాటింగ్‌కు దిగిన ఇంగ్లండ్‌ బౌల్‌​ వేసిన ఓవర్‌లో 15 పరుగులు సాధించింది. స్టోక్స్‌, బట్లర్‌లు బౌల్ట్‌ బౌలింగ్‌ల్‌ ఎదురుదాడికి దిగడంతో సూపర్ ఓవర్‌లో 15 పరుగులు రాబట్టారు. అనంతరం సూపర్‌ ఓవర్‌లో న్యూజిలాండ్ విజయానికి ఆఖరి బంతికి రెండు పరుగులు కావాల్సి ఉండగా, గుప్టిల్ రనౌట్‌ అయ్యాడు. దీంతో సూపర్ ఓవర్ కూడా టై అయింది. దీంతో ఈ మ్యాచ్‌లో ఇంగ్లాండ్ సాధించిన బౌండరీలు ఎక్కువగా ఉండడంతో ఐసీసీ నియమావళి ప్రకారం ఆ జట్టునే విజేతగా ప్రకటించారు.