నన్ను తప్పించేందుకు పెద్ద కుట్ర చేశారు: ఆప్ఘన్ ఓపెనర్ సంచలన వ్యాఖ్యలు

కొంతమంది కలిసి నాపై కుట్ర పన్నారు

"బోర్డులో కొంతమంది కలిసి నాపై కుట్ర పన్నారు. నా స్థానంలో వేరొకరిని జట్టులోకి తీసుకోనున్నారంటూ జట్టు మేనేజర్‌, డాక్టర్‌, కెప్టెన్‌కు ముందుగానే తెలుసు. ఆఫ్ఘన్ జట్టు కోచ్ (ఫిల్ సిమ్మన్స్)కు సైతం మ్యాచ్ తర్వాత తెలిసింది. ఇది నన్ను తీవ్రంగా కలిచి వేసింది" అని షెహజాద్ తీవ్ర ఆవేదనకు గురయ్యాడు.

మా కోచ్‌ కూడా తెలియదు

"మా కోచ్‌ కూడా నన్ను తప్పించిన విషయం తర్వాత కానీ తెలియలేదు. న్యూజిలాండ్‌ మ్యాచ్‌కు ముందు ట్రైనింగ్ ముగించుకుని నా ఫోన్ చెక్ చేసుకున్నా. మోకాలి గాయమంటూ చెప్పి మొత్తం టోర్నీ నుంచి తొలగించారు. టీమ్ బస్సులో ఉన్న ఆటగాళ్ల ఎవ్వరికీ కూడా నన్ను తప్పించిన విషయం తెలియదు. ఈ వార్త విని వారంతా షాక్‌ అయ్యారు" అని షెహజాద్‌ తెలిపాడు.

ఫిట్‌నెస్‌ లేదంటూ షెహజాద్‌ను

ఇంగ్లాండ్ వేదికగా జరుగుతున్న వరల్డ్‌కప్‌లో ఆస్ట్రేలియా, శ్రీలంక జట్లతో రెండు మ్యాచ్‌లు ఆడిన తర్వాత ఫిట్‌నెస్‌ లేదంటూ షెహజాద్‌ను తొలగించిన సంగతి తెలిసిందే. అతడి స్థానంలో యువ క్రికెటర్‌ ఇక్రమ్ అలీ ఖిల్‌ను ఆప్ఘన్ క్రికెట్ బోర్డు ఎంపిక చేసింది. ఈ మెగా టోర్నీలో ఆఫ్ఘనిస్థాన్ తరుపున మహ్మద్‌ షాజాద్‌ కీలక పాత్ర పోషిస్తాడని అంతా భావించారు.

ఆసీస్‌తో జరిగిన మ్యాచ్‌లో డకౌట్‌గా

టోర్నీలో భాగంగా ఆస్ట్రేలియాతో జరిగిన ఆరంభ మ్యాచ్‌లో మహ్మద్‌ షాజాద్‌ డకౌట్‌గా వెనుదిరగగా... ఆ తర్వాత శ్రీలంకతో జరిగిన మ్యాచ్‌లో 12 బంతుల్లో 7 పరుగులు చేశాడు. 2015 వరల్డ్ కప్ నుంచి ఆప్ఘన్ జట్టులో ప్రధాన ఆటగాడిగా కొనసాగుతున్న షాజాద్‌ 55 మ్యాచ్‌ల్లో 1843 పరుగులు చేశాడు.