భారత్‌తో మ్యాచ్‌కు ముందు పాకిస్తాన్‌కు బిగ్ షాక్!

ఐసీసీ మహిళల టీ20 ప్రపంచకప్ 2026 టోర్నమెంట్‌లో క్రికెట్ అభిమానులు ఎంతగానో ఎదురుచూస్తున్న భారత్, పాకిస్థాన్ మ్యాచ్ సమయం ముంచుకొచ్చింది. దాయాదుల మధ్య జరిగే ఈ మ్యాచ్ కోసం ఇరు జట్లూ తీవ్రంగా శ్రమిస్తున్నాయి. ప్రపంచవ్యాప్తంగా ఉన్న క్రీడాభిమానుల దృష్టిని ఆకర్షిస్తున్న ఈ ప్రతిష్టాత్మక పోరుకు సర్వం సిద్ధమైంది. అయితే ఈ మ్యాచ్ ప్రారంభానికి ముందే పాకిస్థాన్ శిబిరంలో తీవ్ర ఆందోళన నెలకొంది.

పాకిస్థాన్ మహిళల క్రికెట్ జట్టుకు మైదానంలో ఊహించని పెద్ద ఎదురుదెబ్బ తగిలింది. టీమిండియాతో జరిగే ఈ కీలక సమరానికి ముందు ఆ జట్టు స్టార్ ఆల్‌రౌండర్, ప్రస్తుత కెప్టెన్ ఫాతిమా సనా ప్రాక్టీస్ సెషన్‌లో తీవ్రంగా గాయపడింది. త్వరలోనే భారత్‌తో తలపడనున్న తరుణంలో కెప్టెన్ ఇలా గాయం బారిన పడటంతో పాక్ శిబిరంలో ఆందోళన నెలకొంది. ఆమె మ్యాచ్ ఆడటంపై సందిగ్ధత నెలకొంది. ఈ ప్రపంచకప్ సమరంలో పాకిస్థాన్ జట్టు నెట్స్ లో తీవ్ర ప్రయాస పడుతోంది. ఈ క్రమంలోనే నెట్ ప్రాక్టీస్ సెషన్‌లో పాల్గొన్న సనా అనుకోకుండా ప్రమాదానికి గురైంది. నెట్స్‌లో బ్యాటింగ్ చేస్తుండగా ఈ ప్రమాదం సంభవించింది. టీమిండియాతో పోరుకు ముందు తమ వ్యూహాలను పదును పెట్టుకునే తరుణంలో ఈ గాయం కావడం జట్టును తీవ్ర ఆందోళనకు గురిచేసింది.

నెట్ ప్రాక్టీసులో మోకాలికి తగిలిన బంతి

ఈ నెట్ ప్రాక్టీస్ సాధన చేస్తున్న క్రమంలో ఆయిషా జఫర్ వేగంగా ఒక షాట్ ఆడింది. అయితే బౌలింగ్ వేసిన తర్వాత తన ఫాలో-థ్రూలో ఉన్న ఫాతిమా సనా వైపు ఆ బంతి దూసుకొచ్చింది. సనా తప్పించుకునే లోపే ఆ బంతి ఆమె కుడి మోకాలికి బలంగా తాకింది. ఆ దెబ్బకు తీవ్ర నొప్పితో సనా మైదానంలోనే కుప్పకూలిపోయి విలవిల్లాడిపోయింది. అక్కడ వెంటనే ఉన్న పాక్ ఫిజియోథెరపిస్ట్, తోటి క్రీడాకారిణులు సనాకు సహాయం చేసేందుకు పరుగెత్తుకుంటూ వచ్చారు. నొప్పి తీవ్రత ఎక్కువగా ఉండటంతో ఆమె స్వయంగా నడవలేకపోయింది. దీంతో వారంతా కలిసి సనాను నెట్స్ నుంచి సురక్షితంగా బయటకు తీసుకువచ్చారు. ఆ తర్వాత ఆమె తన కుడి మోకాలికి ఐస్ ప్యాక్ పట్టుకుని కూర్చోవలసి వచ్చింది. మిగిలిన ప్రాక్టీస్ సమయాన్ని ఆమె కేవలం బౌండరీ లైన్ వద్ద కూర్చుని చూస్తూ గడిపింది.

తీవ్రమైన గాయమైనప్పటికీ.. దాదాపు 45 నిమిషాల సమయం గడిచిన తరువాత ఫాతిమా సనా పరిస్థితిలో కొంత మెరుగుదల కనిపించింది. ఆమె ఎక్కువ ఇబ్బంది పడకుండా స్వయంగా నడవడం ప్రారంభించింది. నెమ్మదిగా నడుచుకుంటూ మైదానంలోని ప్రధాన భాగం వైపు సాగింది. సనా తన గాయం పట్ల సానుకూలంగానే స్పందించింది. ప్రమాదం పెద్దది కాదని క్రీడాభిమానులకు వివరించే ప్రయత్నం చేసింది. తన గాయం గురించి ఫాతిమా సనా మాట్లాడుతూ ఒక ప్రకటన చేసింది. "ఇది ఒక సాధారణ ప్రమాదం మాత్రమే. ఆయిషా బాజీ ఆడిన షాట్ నేరుగా వచ్చి నా మోకాలికి తగిలింది. ప్రస్తుతం నేను బాగానే ఉన్నానని భావిస్తున్నాను. రేపటి కల్లా ఈ నొప్పి తగ్గిపోతుందని, నేను పూర్తి ఫిట్‌నెస్‌తో ఉంటానని ఆశిస్తున్నాను" అని సనా తన ధీమాను వ్యక్తపరిచింది.

పాక్ జట్టులో కీలక పాత్ర పోషిస్తున్న సనా

పాకిస్థాన్ మహిళల జట్టుకు ఫాతిమా సనా అత్యంత కీలక సభ్యురాలిగా రాణిస్తోంది. ఆ జట్టుకు ప్రధాన వేగవంతమైన బౌలర్ అయిన ఆమె.. లోయర్ ఆర్డర్‌లో వచ్చి జట్టుకు తగిన పరుగులు అందిస్తుంది. గత ప్రపంచకప్ ముగిసినప్పటి నుంచి ఆమె బ్యాటింగ్‌లో అత్యంత ప్రమాదకరమైన ఆటతీరును ప్రదర్శిస్తోంది. భారీ హిట్లు కొట్టగలిగే సామర్థ్యం ఉండటంతో ఆమె జట్టులో నమ్మకమైన ఫినిషర్‌గా ఎదిగింది.

గత ఐసీసీ ప్రపంచకప్ తర్వాత నుంచి పరిమిత ఓవర్ల ఫార్మాట్‌లో ఫాతిమా సనా ఆట తీరు పూర్తిగా మారిపోయింది. ఆమె ఏకంగా 183.06 స్ట్రైక్ రేట్‌తో బ్యాటింగ్ చేస్తూ ప్రత్యర్థి జట్ల బౌలర్లను హడలెత్తిస్తోంది. అంతర్జాతీయ మహిళల టీ20 క్రికెట్‌లో అతి తక్కువ బంతుల్లోనే అర్ధ సెంచరీ చేసిన ప్రపంచ రికార్డు కూడా సనా పేరిటే ఉంది. కేవలం 15 బంతుల్లోనే ఆమె యాభై పరుగుల మైలురాయిని దాటింది.

సౌతాఫ్రికా వేదికగా పాట్చెఫ్‌స్ట్రూమ్ నగరంలో జరిగిన మ్యాచ్‌లో కూడా ఫాతిమా సనా తన బ్యాటింగ్ విశ్వరూపాన్ని చూపించింది. ఆ మ్యాచ్‌లో కేవలం 41 బంతులు మాత్రమే ఎదుర్కొన్న ఆమె ఏకంగా 90 పరుగులతో అద్భుతమైన ఇన్నింగ్స్ ఆడింది. ప్రత్యర్థి బౌలర్లకు ఎలాంటి అవకాశం ఇవ్వకుండా భారీ ఎత్తున బౌండరీలు, సిక్సర్లు బాది క్రికెట్ విశ్లేషకుల ప్రశంసలను ఆమె అందుకుంది.

ఫాతిమా సనా మ్యాచ్ ఆడుతుందా?

మరోవైపు హర్మన్‌ప్రీత్ కౌర్ నేతృత్వంలోని టీమిండియా ఈ మ్యాచ్‌తోనే తమ ప్రతిష్టాత్మక ప్రపంచకప్ ప్రస్థానాన్ని ఘనంగా ప్రారంభించాలని భావిస్తోంది. గత రికార్డుల పరంగా పాక్ జట్టుపై ఎప్పుడూ పైచేయి సాధించే భారత్, ఈసారి కూడా అదే జోరును కొనసాగించాలని పట్టుదలగా ఉంది. అయినప్పటికీ ప్రత్యర్థి జట్టును తక్కువ అంచనా వేయకుండా భారత ఆటగాళ్లు ముమ్మరంగా ప్రాక్టీస్ సాగిస్తూనే, సనా గాయానికి సంబంధించిన అప్‌డేట్స్‌ను నిశితంగా గమనిస్తున్నారు. సనా ఆడుతుందా లేదా అనే సందిగ్ధతకు రేపు మ్యాచ్ టాస్ సమయంలోనే పూర్తి స్పష్టత రానుంది.