కుమార్తె కల కోసం టీ కొట్టు నడిపిన తండ్రి: ఎవరీ ఏక్తా బిస్త్!

ఆరేళ్ల వయసు నుంచే క్రికెట్ ఆడిన ఏక్తా బిస్త్

కుందన్‌కు ఏక్తాతో పాటు మరో ఇద్దరు పిల్లలు ఉన్నారు. ఉత్తరాఖండ్‌లోని అల్మోరాలో ఆయన ఈ టీ కొట్టుని నడిపేవాడు. 'ఆరేళ్ల వయసులో ఏక్తా క్రికెట్‌ ఆడడం మొదలు పెట్టింది. అక్కడి నుంచి ఆట పట్ల ఆమెకు ఇష్టం పెరుగుతూ పోయింది. ఆమె భారతదేశం గర్వపడేలా చేస్తుందని మాకు ముందు నుంచీ తెలుసు. 2011లో భారత జట్టులో చేరినప్పటి నుంచి అదే చేస్తోంది' అని ఏక్తా తండ్రి తెలిపాడు.

పదేళ్ల పాటు టీ కొట్టుని నడిపిన ఏక్తా తండ్రి

సుమారు పదేళ్ల పాటు ఏక్తా తండ్రి కుందన్ టీ కొట్టుని నడిపాడు. ఇక్కడ గమనించాల్సన విషయం ఏమిటంటే క్రికెట్ ఆడే అమ్మాయిలు లేకపోవడంతో ఏక్తా మగపిల్లలో కలిసి క్రికెట్‌ ఆడేదట. 'క్రికెట్ అంటే ఆమెకు ఎంతో ఇష్టం. ఎంతగా అంటే ఆమె అబ్బాయిలతో కూడా క్రికెట్‌ ఆడేది. అబ్బాయిల మధ్య ఏక్తా ఒక్కతే అమ్మాయి కావడంతో చాలా మంది ఆట చూసేందుకు వచ్చేవారు' అని పేర్కొన్నాడు.

ఆర్థికంగా ఇబ్బంది పడ్డా కుమార్తెకు అండగా నిలిచాం

ఆర్థికంగా చాలా ఇబ్బందులు పడ్డా ఏక్తాకు పూర్తిగా అండగా నిలిచామని ఆయన అన్నాడు. ఆమె ఎంతో బాధ్యతాయుతంగా ఉండేదని, అప్పట్లో ట్రయల్స్‌ సందర్భంగా మేమిచ్చే డబ్బును చాలా పొదుపుగా వాడుకునేదని అని ఏక్తా తల్లి తెలిపింది. అయితే ఆ తర్వాత కాలంలో పెన్షన్‌ పెరగడంతో టీ కొట్టును మూసేసినట్లు ఆమె తెలిపింది.

బంతిని వేగంగా వికెట్ల మీదకు విసరగలదు

ఎడమ చేతి వాటం బౌలింగ్‌తో ఆరంభం అందర్ని ఆకట్టుకున్న ఏక్తా బంతిని వేగంగా వికెట్ల మీదకు వచ్చేలా వేయడంలో స్పెషలిస్ట్‌. 2006లో ఉత్తర ప్రదేశ్ జట్టుకు ఎంపికైన ఆమె.. దేశవాళీ పోటీల్లో సత్తా చాటి.. 2011లో నాలుగు దేశాల వన్డే టోర్నీలో పాల్గొన్న భారత వన్డే జట్టులో చోటు సంపాదించింది.

ఫ్లయిటెడ్‌ డెలివరీలు ఏక్తా ప్రత్యేకత

ఆస్ట్రేలియాతో తొలి మ్యాచ్‌లోనే ఆకట్టుకున్న బిస్త్‌ (2/32) ఆ తర్వాత గౌహర్‌ సుల్తానాకు పోటీగా తయారైంది. మిగిలిన లెఫ్ట్‌ ఆర్మ్‌ స్పిన్నర్లతో పోలిస్తే బంతిని వేగంగా వేయడం కూడా ఆమెకు కలిసొచ్చింది. లైన్‌ అండ్‌ లెంగ్త్‌ తప్పకపోవడం, ఫ్లయిటెడ్‌ డెలివరీలు వేయడం ఆమె బలాలుగా మారాయి.

టీ20 టోర్నీలో హ్యాట్రిక్‌ చేసి చరిత్ర

ఆమె తీసిన వికెట్లలో ఎక్కువగా బౌల్డ్‌ లేదా ఎల్బీడబ్ల్యూలే అంటే ఆమె బౌలింగ్‌‌ను చేస్తుందో అర్థం చేసుకోవచ్చు. 2012లో కొలంబోలో జరిగిన ప్రపంచ టీ20 టోర్నీలో హ్యాట్రిక్‌ చేసి చరిత్ర సృష్టించింది. ఏ ఫార్మాట్లో అయినా హ్యాట్రిక్‌ చేసిన తొలి భారత మహిళా క్రికెటర్‌గా ఆమె నిలిచింది. ఈ ప్రదర్శనే బిస్త్‌కు భారత మహిళల జట్టులో తన స్ధానాన్ని సుస్థిరం చేసింది.