ఇంగ్లాండ్ టెస్ట్ కోచ్‌గా రాహుల్ ద్రవిడ్?

ఇంగ్లాండ్ టెస్ట్ కోచ్ బ్రెండన్ మెకల్లమ్ వైదొలగనున్నారు. బెన్ స్టోక్స్ ఇటీవల టెస్ట్ క్రికెట్ నుంచి రిటైర్ అయిన నేపథ్యంలో ఇంగ్లాండ్ క్రికెట్ బోర్డు ఇప్పుడు రెడ్-బాల్ జట్టు కోచ్‌ను కూడా మార్చాలని నిర్ణయించింది. ఈ రేసులో భారత దిగ్గజం రాహుల్ ద్రవిడ్ పేరు ముందు వరుసలో ఉన్నట్లు భావిస్తున్నారు. ఇంగ్లాండ్ టెస్ట్ జట్టు కొత్త హెడ్ కోచ్ అయ్యేందుకు ఉన్న అంచనా అభ్యర్థుల జాబితాలో రాహుల్ ద్రవిడ్ అగ్రస్థానంలో ఉన్నట్లు సమాచారం.

రేసులో ముందున్న రాహుల్ ద్రవిడ్ పేరు?
నాలుగేళ్ల తర్వాత బ్రెండన్ మెకల్లమ్ ను తొలగించాలని ఇంగ్లాండ్ నిర్ణయించుకున్నట్లు తెలుస్తోంది. మెకల్లమ్ స్థానాన్ని భర్తీ చేసే ప్రయత్నాలు ఇప్పటికే మొదలయ్యాయి. రాహుల్ ద్రవిడ్‌తో పాటు జింబాబ్వేకు చెందిన ఆండీ ఫ్లవర్, శ్రీలంక మాజీ వికెట్ కీపర్-బ్యాటర్ కుమార సంగక్కర, ఆస్ట్రేలియా మాజీ బ్యాటర్ జస్టిన్ లాంగర్, ప్రస్తుత పాకిస్థాన్ కోచ్ మైక్ హెసన్ కూడా ఈ రేసులో ఉన్నారని సమాచారం. వీరందరికీ అంతర్జాతీయ, ఫ్రాంచైజీ క్రికెట్ రెండింటిలోనూ మంచి కోచింగ్ అనుభవం ఉంది. ఈ పేర్లన్నింటిలోనూ అతి తక్కువ కోచింగ్ అనుభవం ఉన్నప్పటికీ.. ఇంగ్లాండ్ మాజీ ఆల్‌రౌండర్ ఆండ్రూ ఫ్లింటాఫ్ పేరు కూడా చర్చలో ఉంది.

బెస్ట్ కోచ్‌గా నిరూపించుకోగల సత్తా ద్రవిడ్‌కు ఉంది..
రాహుల్ ద్రవిడ్ మన కాలపు బెస్ట్ కోచ్‌లలో ఒకరిగా పరిగణించబడతాడు. రాహుల్ ద్రవిడ్ తన కోచింగ్ కెరీర్లో టీమిండియా యువ ఆటగాళ్లను తీర్చిదిద్దారు. 2018లో ఆయన హయాంలో పృథ్వీ షా నాయకత్వంలోని జట్టు అండర్-19 ప్రపంచ కప్‌ను గెలుచుకుంది. ఆ తర్వాత ఆయన సీనియర్ జట్టులో చేరగా. ఆ జట్టు 2024 టీ20 ప్రపంచ కప్‌ను గెలుచుకుని, 2023 ప్రపంచ కప్ ఫైనల్లో ఆడింది. రాహుల్ ద్రవిడ్ ఓ గొప్ప టెస్ట్ బ్యాటర్‌గా 36 సెంచరీలు, 63 హాఫ్ సెంచరీలతో సహా 13,288 టెస్ట్ పరుగులు చేశాడు.

బ్రెండన్ మెకల్లమ్ కెరీర్‌కు ముగింపు
బ్రెండన్ మెకల్లమ్ కోచ్ పదవి నుంచి వైదొలగితే బేజ్ బాల్ శకం ముగిసిందని భావించవచ్చు. బ్రెండన్ మెకల్లమ్, బెన్ స్టోక్స్ భాగస్వామ్యం టెస్ట్ క్రికెట్లోని దూకుడు వైఖరికి పెట్టింది పేరు. అయితే ఫలితాలు మాత్రం వారికి అనుకూలంగా రాలేదు. మెకల్లమ్ హయాంలో ఇంగ్లాండ్ 55 టెస్టులు ఆడి 27 గెలవగా.. 20 ఓడిపోయింది. మూడు ప్రపంచ క్రికెట్ సిరీస్ ఎడిషన్లు పూర్తయినప్పటికీ.. వారు ఒక్కసారి కూడా ఫైనల్‌కు చేరడంలో విఫలమయ్యారు.