డీఆర్ఎస్ నిర్ణయంపై జట్టుతో చర్చిస్తా: కెప్టెన్ కోహ్లీ

ఢాకా: బంగ్లాదేశ్‌తో జరుగుతున్న సిరిస్‌లో డెసిషన్ రివ్యూ సిస్టమ్ (డీఆర్‌ఎస్) లేకపోవడంపై టీమిండియా టెస్టు కెప్టెన్ విరాట్ కోహ్లీ స్పందించాడు. బీసీసీఐ డీఆర్ఎస్ విధానాన్ని వ్యతిరేకిస్తున్న నేపథ్యంలో కోహ్లీ వ్యాఖ్యలు కొంత ప్రాధాన్యతను సంతరించుకున్నాయి.

ఈ డీఆర్ఎస్ విధానంపై త్వరలో టీమ్ సభ్యులతో కలిసి చర్చిస్తానని చెప్పాడు. అటు బౌలర్లు, ఇటు బ్యాట్స్‌మెన్‌లు ఈ నిర్ణయంపై ఏమి అనుకుంటున్నారో కచ్చితంగా తెలుసుకోవాల్సిన అవసరం ఉందని అభిప్రాయపడ్డాడు.

'డీఆర్ఎస్ నిర్ణయంపై జట్టు సభ్యలమంతా సమావేశమవుతాం. గతేడాది ధోనీ కూడా డీఆర్ఎస్ నిర్ణయం అమలుపై సానుకూల ధోరణి వ్యక్తం చేశాడు. అయితే ఇందులో ఫీల్డ్ అంపైర్ల పాత్ర ఎంతవరకు ఉండాలి అనేది కూడా ప్రధానాంశం. ఆటగాళ్ల అప్పీళ్లతోనే డీఆర్ఎస్‌కు వెళితే బాగుంటుందని అప్పట్లో ధోనీ చెప్పాడు. డీఆర్ఎస్‌పై బీసీసీఐ నిర్ణయంలో త్వరలో మార్పు రావచ్చు' అని కోహ్లీ అన్నాడు.