ఐపీఎల్ హీరోకు ఎందుకీ మొండిచేయి? సెలెక్టర్లు కళ్లు మూసుకున్నారా?

ఐపీఎల్ 2026 ముగిసిన వెంటనే బీసీసీఐ ప్రకటించిన టీమిండియా జట్టు ఎంపిక ఇప్పుడు పెను సంచలనం రేపుతోంది. ఇంగ్లాండ్, ఐర్లాండ్ పర్యటనల కోసం చీఫ్ సెలెక్టర్ అజిత్ అగార్కర్ నేతృత్వంలోని కమిటీ ఎంపిక చేసిన జట్టుపై సర్వత్రా విమర్శలు వ్యక్తమవుతున్నాయి. ముఖ్యంగా ఈ ఏడాది ఆర్సీబీ తరఫున ఆడి తన అద్భుతమైన బౌలింగ్‌తో ప్రత్యర్థి జట్లను వణికించిన సీనియర్ స్వింగ్ మాస్టర్ భువనేశ్వర్ కుమార్‌ను సెలెక్టర్లు పూర్తిగా విస్మరించడంపై క్రీడా విశ్లేషకులు, అభిమానులు తీవ్ర ఆగ్రహం వ్యక్తం చేస్తున్నారు. అద్భుతంగా ప్రదర్శన చేసినా ఆయనకు మొండిచేయి చూపడం వెనుక అసలు కారణాలేంటని నెటిజన్లు ప్రశ్నిస్తున్నారు.

ఈ ఐపీఎల్ సీజన్ భువనేశ్వర్ కుమార్‌కు ఓ అద్భుతమైన రీ-ఎంట్రీ లాంటిది. ఆర్సీబీ జట్టును వరుసగా రెండోసారి ఛాంపియన్‌గా నిలపడంలో భువీ పాత్ర సామాన్యమైనది కాదు. ఈ టోర్నీలో మొత్తం 16 మ్యాచ్‌లు ఆడిన భువీ ఏకంగా 28 వికెట్లు పడగొట్టి పర్పుల్ క్యాప్ రేసులో నిలిచాడు. ఈ సీజన్లో అత్యధిక వికెట్లు తీసిన టాప్-4 బౌలర్ల జాబితాను పరిశీలిస్తే.. అందులో చోటు దక్కించుకున్న ఏకైక భారతీయ బౌలర్ భువనేశ్వర్ కుమార్ మాత్రమే. కేవలం 29 వికెట్లతో అగ్రస్థానంలో ఉన్న విదేశీ ప్లేయర్ కగిసో రబాడ కంటే ఆయన ఒక్క వికెట్ మాత్రమే వెనుకబడి ఉన్నాడు. ఇంతటి ఘనమైన రికార్డును సెలెక్షన్ కమిటీ ఎలా పక్కన పెట్టేసిందో ఎవరికీ అర్థం కావడం లేదు.

అయితే సెలెక్టర్ల ద్వంద్వ వైఖరిని ఎండగడుతూ క్రికెట్ వర్గాల నుంచి మరో బలమైన వాదన వినిపిస్తోంది. ఇదే ఐపీఎల్ ప్రదర్శన ఆధారంగా దాదాపు రెండున్నరేళ్ల పాటు అంతర్జాతీయ క్రికెట్‌కు దూరంగా ఉన్న 31 ఏళ్ల శ్రేయస్ అయ్యర్‌ను తిరిగి జట్టులోకి తీసుకోవడమే కాకుండా ఏకంగా జట్టుకు కెప్టెన్‌గా బాధ్యతలు అప్పగించారు. పంజాబ్ కింగ్స్ తరఫున ఆడిన శ్రేయస్ అయ్యర్ 14 మ్యాచ్‌ల్లో 498 పరుగులు చేశాడు. ఓ బ్యాటర్‌కు వర్తించిన రూల్.. అదే స్థాయిలో వికెట్లు తీసి సంచలన ఫామ్‌లో ఉన్న భువనేశ్వర్ కుమార్‌కు ఎందుకు వర్తించలేదనేది ఇప్పుడు మిస్టరీగా మారింది. కేవలం భవిష్యత్తు ప్రణాళికలు అనే ఒక సాకును చూపి భువీ లాంటి సీనియర్‌ను పక్కన పెట్టడం ఎంతవరకు సమంజసమని మాజీ స్పిన్నర్ రవిచంద్రన్ అశ్విన్ కూడా సెలెక్టర్ల వ్యూహాన్ని తీవ్రంగా తప్పుబట్టారు.

ఈ పర్యటన కోసం వైభవ్ సూర్యవంశీ, ప్రిన్స్ యాదవ్ వంటి నూతన ప్రతిభావంతులకు చోటు కల్పించాలనే సెలెక్టర్ల ఆలోచన మంచిదే అయినప్పటికీ.. ఇంగ్లాండ్ లాంటి స్వింగ్ పిచ్‌లపై భువనేశ్వర్ కుమార్ లాంటి టాలెంటెడ్ బౌలర్ అవసరం ఎంతో ఉంది. 2022లో భారత్ తరఫున చివరి మ్యాచ్ ఆడిన భువీ.. ఎలాగైనా జాతీయ జట్టులోకి రీ-ఎంట్రీ చేయాలనే కసితో ఈ ఐపీఎల్‌లో చెలరేగిపోయాడు. మైదానంలో తన అత్యుత్తమ ప్రదర్శనతో అర్హతను నిరూపించుకున్నప్పటికీ.. సెలెక్టర్లు ఆయన వైపు చూడకపోవడం కేవలం నిరాశకు గురిచేయడమే కాకుండా, ఈ సీనియర్ ఆటగాడికి జరిగిన 'ఘోర అన్యాయం' అని క్రీడా పండితులు అభివర్ణిస్తున్నారు. రాబోయే రోజుల్లో అయినా సెలెక్షన్ కమిటీ తమ తప్పును సరిదిద్దుకుంటుందో లేదో చూడాలి.