3 ఏళ్ల క్రితం నాటి ధోని వీడియోని పోస్టు చేసిన ఆనంద్ మహీంద్ర!

3 ఏళ్ల క్రితంనాటి వీడియోని

"3 ఏళ్ల క్రితంనాటి వీడియోని నా వాట్సప్ వండర్‌బాక్స్‌లో ఈరోజు పోస్టు చేస్తున్నాను. ధోని, ఆర్మీ దుస్తుల్లో నువ్వు చాలా అందంగా ఉన్నావ్‌.. అదేవిధంగా నీ ప్రయాణానికి కేటాయించిన వాహనంలో నువ్వు మరింత హుందాగా కనిపిస్తున్నావు" అంటూ ఓ వీడియోని తన అధికారిక ట్విటర్‌లో షేర్‌ చేశాడు.

ధోని ప్రయాణించిన వాహనం

కాగా, ధోని ప్రయాణించిన వాహనం మహీంద్ర XUV 500. ఆ వాహనాన్ని మహీంద్ర & మహీంద్ర సంస్ధ తయారు చేసింది. దీంతో తన సంస్థకు చెందిన వాహనంలో ధోని ప్రయాణించడంతో ఆనంద్‌ మహీంద్ర ఆ విధంగా ట్వీట్‌ చేశారు. ప్రస్తుతం ఈ ట్వీట్‌ సోషల్‌ మీడియాలో వైరల్ అయింది.

వెస్టిండిస్ పర్యటనకు ధోని దూరం

ఇదిలా ఉంటే, ప్రపంచకప్ ముగిసిన తర్వాత టీమిండియా వెస్టిండిస్ పర్యటనకు బయల్దేరనుంది. ఆగస్టు 3 నుంచి ఆరంభమయ్యే ఈ పర్యటన నుంచి విరామం తీసుకుని, రెండు నెలలపాటు భారత సైన్యంలో సేవలందించాలని ధోని నిర్ణయం తీసుకున్న సంగతి తెలిసిందే. ఈ రెండు నెలలు ఆర్మీకి సేవలు అందించేందుకు భారత్ ఆర్మీ ఛీఫ్ సైతం అంగీకరించారు.

లెఫ్టినెంట్‌ కల్నల్‌ హోదాలో ధోని

టెరిటోరియల్‌ ఆర్మీ పారాచూట్‌ రెజిమెంట్‌లో ధోనీ లెఫ్టినెంట్‌ కల్నల్‌ హోదాలో కొనసాగుతున్న సంగతి తెలిసిందే. దీంతో ఈ రెండు నెలలు ధోని పారామిలటరీ రెజిమెంట్‌తో కలిసి పనిచేయనున్నాడు. ఈ రెండు నెలలు ధోని పారాచూట్‌ రెజిమెంట్‌ విభాగంలో చేరి దేశ సైనికుడిగా సేవలందిస్తాడు. ధోని నిర్ణయంపై సోషల్ మీడియా వేదికగా ప్రశంసల వర్షం కురుస్తోంది.