సెమీస్‌లో అడుగుపెడుతున్నందుకు అభినందనలు

హైదరాబాద్: ఐసీసీ మహిళల టీ20 ప్రపంచకప్‌లో భాగంగా ఆరంభమైన టోర్నీలో ఆరంభం నుంచి హర్మన్‌ప్రీత్‌ సేన అదరగొడుతోంది. తొలి 3 మ్యాచ్‌లలో హ్యాట్రిక్‌ విజయాలతో సత్తా చాటిన భారత మహిళా క్రికెటర్లు.. నాకౌట్‌ పోరులోనూ పటిష్టంగా కనిపించిన ఆస్ట్రేలియాతోనూ అదే జోరు కొనసాగించింది. బ్యాటింగ్‌లో మంధాన(83; 55 బంతుల్లో 9ఫోర్లు, 3సిక్సులు) ధనాధన్‌ మెరుపులు.. బౌలింగ్‌లో అనూజ (3/15), పూనమ్‌ యాదవ్‌ (2/28), రాధ యాదవ్‌ (2/10), దీప్తి శర్మ (2/24) ఆసీస్‌ బ్యాట్స్‌వుమెన్‌ను ఓ ఆట ఆడుకోవడంతో మొత్తంగా 48పరుగుల భారీ తేడాతో భారత్‌ ఖాతాలో మరో అద్భుత విజయం వచ్చిచేరింది.

తొలి మూడు మ్యాచ్‌లలో తక్కువ పరుగులకే పెవిలియన్‌కు చేరిన ఎడమ చేతి వాటం బ్యాటర్‌.. ఓపెనర్‌ మంధాన ఆసీస్‌తో మ్యాచ్‌లో సరైన సమయంలో గేర్‌ మార్చి సిసలైన ఆటతో దూకుడు కొనసాగించింది. తాజా విజయంతో గ్రూపు-బిలో భారత్‌ ఆడిన 4 మ్యాచ్‌ల్లోనూ విజయం సాధించి 8పాయింట్లతో అగ్రస్థానంలో నిలిచింది. దీంతో టీమిండియాను ప్రోత్సాహిస్తూ.. క్రికెట్ దిగ్గజాలంతా శుభాకాంక్షలు తెలియజేస్తున్నారు.

ఆరంభం నుంచి ఆస్ట్రేలియాపై ఆధిప్యతం చెలాయిస్తూ మరో విజయాన్ని ఖాతాలో వేసుకున్న భారత మహిళల జట్టుకు అభినందనలు. ఈ మ్యాచ్‌లో మీ ప్రదర్శన ఎంతగానో ఆకట్టుకుంది.

మూడు సార్లు ఛాంపియన్‌ను టీమిండియా ఎదుర్కొన్న తీరు ఎంతగానో ఆకట్టుకుంది. ప్రపంచకప్‌లో ప్రతి మ్యాచ్‌లోనూ ప్రత్యర్థిపై టీమిండియా అద్భుతంగా ఆధిపత్యం చెలాయిస్తుంది. స్మృతి ఇన్నింగ్స్‌ ఎంతో ప్రత్యేకం. మిగతా మ్యాచ్‌ల్లోనూ ఇదే దూకుడు కొనసాగించండి.