ఒమన్‌పై గెలిచి.. భారత్‌కు పాక్ కెప్టెన్ సవాల్!

ఆసియా కప్‌లో భాగంగా ఒమన్‌తో జరిగిన మ్యాచ్ లో విజయం సాధించినప్పటికీ.. తమ జట్టు బ్యాటింగ్‌లో ఇంకా చాలా మెరుగుపడాల్సిన అవసరం ఉందని పాకిస్థాన్ కెప్టెన్ సల్మాన్ అలీ ఆఘా అభిప్రాయపడ్డాడు. ఈ మ్యాచ్‌లో తొలుత బ్యాటింగ్ చేసిన పాకిస్తాన్ నిర్ణీత 20 ఓవర్లలో 7 వికెట్లు కోల్పోయి 160 పరుగులు చేసింది. అనంతరం లక్ష్య ఛేదనలో ఒమన్ జట్టు 67 పరుగులకే ఆలౌట్ అయి, 93 పరుగుల తేడాతో ఓటమి పాలైంది. ఈ మ్యాచ్‌లో ఒమన్ బౌలర్లు రాణించినా, బ్యాటర్లు దారుణంగా విఫలమయ్యారు. అయితే భారత్‌తో కీలక మ్యాచ్‌కు ముందు పాకిస్తాన్ బ్యాటింగ్ బలహీనతలు బయటపడటం ఆందోళన కలిగిస్తోంది. మ్యాచ్ అనంతరం పాక్ కెప్టెన్ సల్మాన్ అలీ ఆఘా మీడియాతో మాట్లాడుతూ.. జట్టు ప్రదర్శనపై పూర్తి విశ్లేషణను పంచుకున్నాడు.

బ్యాటింగ్, బౌలింగ్ ప్రదర్శనపై..
సల్మాన్ అలీ ఆఘా మాట్లాడుతూ.. "బ్యాటింగ్‌లో మేము ఇంకా కష్టపడాలి. ముఖ్యంగా టాపార్డర్ వైఫల్యం మమ్మల్ని కొంత నిరాశపరిచింది. అయితే, మా బౌలింగ్ విభాగం మాత్రం అద్భుతంగా రాణించింది. మా బౌలర్లు ఒమన్‌ను తక్కువ స్కోరుకే కట్టడి చేయగలిగారు. ముఖ్యంగా మా స్పిన్నర్లు చాలా బాగా బౌలింగ్ చేశారు. షాహీన్ అఫ్రిది తన రెండో స్పెల్‌లో, అలాగే ఫహీమ్ అష్రఫ్ కూడా అద్భుతంగా బౌలింగ్ చేశారు. మాకు ముగ్గురు ప్రధాన స్పిన్నర్లు ఉన్నారు, వారందరూ ఒకరికొకరు భిన్నంగా ఉంటారు. బౌలింగ్‌లో మంచి ఆప్షన్లు ఉండటం మాకు బలం" అని ఆగా బౌలింగ్ యూనిట్‌ను ప్రశంసించాడు. "యూఏఈ లాంటి పిచ్‌లపై స్పిన్నర్లు కీలక పాత్ర పోషిస్తారు, అందుకే మా జట్టులో ఎక్కువ మంది స్పిన్నర్లు ఉండటం ఒక మంచి విషయం" అని పేర్కొన్నాడు.

ఆశించిన స్కోరుపై..
ఈ మ్యాచ్‌లో తమ జట్టు సాధించిన స్కోరుపై సల్మాన్ అలీ ఆఘా మాట్లాడుతూ, "మేము ఎన్ని పరుగులు చేయాలనేది చెప్పడం కష్టం. కానీ,మ్యాచ్ మొదలైన తీరు చూస్తే, మేము సులభంగా 180 పరుగులకు పైగా చేసి ఉండాల్సింది. కానీ క్రికెట్‌లో ఎప్పుడు ఏం జరుగుతుందో చెప్పలేం." అని అన్నాడు.

భారత్‌తో జరిగే కీలక మ్యాచ్ గురించి..
సెప్టెంబర్ 14న భారత్‌తో జరగబోయే కీలక మ్యాచ్ గురించి ఆత్మవిశ్వాసం వ్యక్తం చేస్తూ.. "మేము గత 2-3 నెలలుగా చాలా మంచి క్రికెట్ ఆడుతున్నాం. ఈ మాట పదేపదే చెబుతున్నాను. మేము మా ప్రణాళికలను కరెక్ట్‌గా అమలు చేయగలిగితే, ప్రపంచంలోని ఏ జట్టునైనా ఓడించగలం. భారత్‌తో జరిగే మ్యాచ్‌లో మా బలాబలాలను నిరూపించుకోవడానికి సిద్ధంగా ఉన్నాం" అని సల్మాన్ అలీ ఆఘా పేర్కొన్నాడు. ఈ మ్యాచ్‌లో బలహీనతలను అధిగమించి, భారత్‌తో జరిగే పోరులో పాకిస్తాన్ ఏ విధంగా రాణిస్తుందో చూడాలి.