రికీ పాంటింగ్‌తో శ్రీశాంత్ గొడవ, వార్మప్ మ్యాచులో సంఘటన

బెంగళూరు: భారత్‌-ఆస్ట్రేలియా వార్మ్‌ప్‌ మ్యాచ్‌లో భారత బౌలర్ శ్రీశాంత్ తన సహజ ధోరణి ప్రదర్శించాడు. ప్రవీణ్‌కుమార్‌ స్థానంలో జట్టులోకొచ్చిన శ్రీశాంత్‌ ఆసీస్‌ కెప్టెన్‌ రికీ పాంటింగ్‌తో వాగ్వాదానికి దిగాడు. శ్రీ బౌలింగ్‌ చేస్తున్న సమయంలో ఈ సంఘటన జరిగింది. పదో ఓవర్లో పాంటింగ్‌ వరుసగా బంతుల్ని వదిలేయడంతో ఉత్సాహం ఆపుకోలేని శ్రీశాంత్‌ అతని వద్దకెళ్లి నోటికి పని చెప్పాడు. రికీ కూడా అతనికి బదులిచ్చాడు.

తర్వాత బంతికి పాంటింగ్‌ వికెట్‌కీపర్‌కు క్యాచ్‌ ఇచ్చినట్లు శ్రీ బలమైన అప్పీల్‌ చేశాడు. దీనికి అంపైర్‌ నిరాకరించడంతో తన అసంతృప్తిని చేతి సైగలతో వెల్లడించాడు. ఆ సంఘటన సమయంలో కూడా ఇద్దరి మధ్య మాటలు నడిచాయి.