ట్రెంట్ బ్రిడ్జ్ : వన్డేల్లో హ్యాట్రిక్ ప్రపంచకప్ లు సాధించిన ఆసీస్ ఈసారి టీ20 ప్రపంచకప్ లో కనీసం గ్రూప్ దశను కూడా అధిగమించలేకపోయింది. సోమవారం జరిగిన మ్యాచ్ లో 6 వికెట్ల తేడాతో శ్రీలంక చేతిలో ఓడిపోయి టోర్నీ నుంచి నిష్క్రమించింది. 160 పరుగుల లక్ష్యాన్ని శ్రీలంక 19 ఓవర్లలో 4 వికెట్లు కోల్పోయి ఛేదించింది. ఆరంభంలో దిల్షాన్ (53; 32 బంతుల్లో 10X4) చెలరేగిపోగా కెప్టెన్ ఇన్నింగ్స్ ఆడిన మ్యాన్ ఆఫ్ ద మ్యాచ్ సంగక్కర (55 నాటౌట్ ; 42 బంతుల్లో 4X4, 2X6) కడవరకూ క్రీజులో నిలిచి జట్టును విజయ తీరాలకు చేర్చాడు. ఆఖర్లో ఆసీస్ ఒత్తిడి తెచ్చే ప్రయత్నం చేసినా భారీ షాట్లు కొట్టిన ముబారక్ (21; 12 బంతుల్లో 1X4, 2X6) ఆ జట్టు ఆశలపై నీళ్లు చల్లాడు. ఆసీస్ ఆడిన రెండు మ్యాచ్ ల్లోనూ ఓడడంతో గ్రూప్ సి నుంచి శ్రీలంక, వెస్టిండీస్ సూపర్ 8లో అడుగుపెట్టాయి. మొదట బ్యాటింగ్ చేసిన ఆసీస్ ను అజంత మెండిస్ (3/20) తన స్పిన్ మాయాజాలంతో దెబ్బతీశాడు. ఐతే ఆఖర్లో మిచెల్ జాన్సన్ (28 నాటౌట్ ; 13 బంతుల్లో 2X4, 2X6) మెరుపులు మెరిపించడంతో ఆసీస్ నిర్ణీత ఓవర్లలో 9 వికెట్లకు 159 పరుగులు చేయగలిగింది. టాస్ ఓడి బ్యాటింగ్ కు దిగిన ఆస్ట్రేలియాకు తొలి ఓవర్లోనే షాక్ తగిలింది. స్కోరు బోర్డుపై ఒక పరుగు చేరిందో లేదో ఓపెనర్ డేవిడ్ వార్నర్ (0) ఔటయ్యాడు. మూడు ఓవర్లు ముగిసేసరికి స్కోరు 9 పరుగులు మాత్రమే. కానీ తర్వాతి రెండు ఓవర్లలో స్కోరు అమాంతం పెరిగింది. నాలుగో ఓవర్లో వాట్సన్ (22; 21 బంతుల్లో 2X4, 1X6) వరుసగా రెండు ఫోర్లు, ఒక సిక్స్ కొట్టగా ఐదో ఓవర్లో పాంటింగ్ (25; 15 బంతుల్లో 5X4) హ్యాట్రిక్ బౌండరీలు సాధించాడు. మెండిస్ వరుస ఓవర్లలో ఈ ఇద్దరి పెవిలియన్ చేర్చి ఆసీస్ ను దెబ్బతీశాడు. పాంటింగ్ క్లీన్ బౌల్డ్ కాగా వాట్సన్ వికెట్ల ముందు దొరికిపోయాడు. హడిన్ (16), మైకేల్ క్లార్క్ (11), మైక్ హసి (1) త్వరగా ఔటై ఆసీస్ ను కష్టాల్లోకి నెట్టారు. 15 ఓవర్లు ముగిసే సరికి స్కోరు 94/6 మాత్రమే. అయినా ఆ జట్టు స్కోరు 159కి చేరిందంటే అది డేవిడ్ హసి (28; 22 బంతుల్లో 1X4, 2X6), జాన్సన్ ల చలవే. ఇద్దరూ చెలరేగడంతో చివరి 5 ఓవర్లలో ఆసీస్ 65 పరుగులు పిండుకుంది. ఆస్ట్రేలియా: వాట్సన్ ఎల్బీ (బి) మెండిస్ 22; వార్నర్ (సి) దిల్షాన్ (బి) మాథ్యూస్ 0; పాంటింగ్ (బి) మెండిస్ 25; హడిన్ (బి) మలింగ 16; క్లార్క్ (సి) అండ్ (బి) ఉదాన 11; డేవిడ్ హసి (సి) జయసూర్య (బి) ఉదాన 28; మైకెల్ హసి ఎల్బీ (బి) మెండిస్ 1; జాన్సన్ నాటౌట్ 28; బ్రెట్ లీ (బి) మలింగ 15; హారిట్జ్ (సి) సంగక్కర (బి) మలింగ 4; బ్రాకెన్ నాటౌట్ 4; ఎక్స్ ట్రాలు 5 మొత్తం: (20 ఓవర్లలో 9 వికెట్లకు) 159, వికెట్ల పతనం: 1-1, 2-48, 3-59, 4-74, 5-79, 6-94, 7-135, 8-151, 9-155 బౌలింగ్ : మాథ్యూస్ 2-0-10-1; జయసూర్య 2-0-17-0; ఉదాన 4-0-47-2; మలింగ 4-0-36-3; మెండిస్ 4-0-20-3; మురళీధరన్ 4-0-29-0 శ్రీలంక ఇన్నింగ్స్ : దిల్షాన్ (బి) క్లార్క్ 53; జయసూర్య (సి) వార్నర్ (బి) లీ 2; సంగక్కర నాటౌట్ 55; జయవర్ధనే (సి) బ్రాకెన్ (బి) హారిట్జ్ 9; చమర సిల్వ (సి) పాంటింగ్ (బి) లీ 11; ముబారక్ నాటౌట్ 21; ఎక్స్ ట్రాలు 9 మొత్తం: (19 ఓవర్లలో 4 వికెట్లకు) 160, వికెట్ల పతనం: 1-19, 2-81, 3-98, 4-127 బౌలింగ్ : లీ 4-0-39-2; జాన్సన్ 2-0-17-0; బ్రాకెన్ 4-0-33-0; వాట్సన్ 2-0-24-0; హారిట్జ్ 4-0-27-1; క్లార్క్ 3-0-19-1.