ఎందుకింత యాటిట్యూడ్ బ్రో: నువ్వేమైనా కోహ్లీ, రోహిత్ అనుకుంటున్నావా?

టీమిండియా యువ ఆల్‌రౌండర్ వాషింగ్టన్ సుందర్ ప్రస్తుతం సోషల్ మీడియా వేదికగా హాట్ టాపిక్‌గా మారారు. ఓ వైరల్ వీడియో కారణంగా ఆయన ప్రవర్తనపై నెటిజన్లు రెండు వర్గాలుగా విడిపోయి చర్చిస్తున్నారు. అసలు విషయానికొస్తే.. ఇటీవల ఓ హోటల్ నుంచి బయటకు వస్తున్న వాషింగ్టన్ సుందర్‌ను అభిమానులు చుట్టుముట్టారు.కొందరు సెల్ఫీల కోసం, మరికొందరు ఆటో‌గ్రాఫ్‌ల కోసం ప్రయత్నించారు. అయితే వాషింగ్టన్ సుందర్ వారిని ఏమాత్రం పట్టించుకోకుండా కనీసం స్పందించకుండా ముందుకు సాగిపోయాడు.

దానికి సంబంధించిన వీడియో నెట్టింట వైరల్‌గా మారింది. ఈ వీడియో చూసిన నెటిజన్లు ఆగ్రహం వ్యక్తం చేస్తున్నారు. "నువ్వేమైనా విరాట్ కోహ్లీ, రోహిత్ శర్మ అనుకుంటున్నావా? అంత యాటిట్యూడ్ ఎందుకు?" అంటూ కొందరు నెటిజన్లు తీవ్రంగా విమర్శిస్తున్నారు. మరికొందరు మాత్రం ఆయనకు మద్దతుగా నిలుస్తున్నారు. సెలబ్రిటీలకు కూడా వ్యక్తిగత ప్రైవసీ ఉంటుందని, ఎప్పుడూ కెమెరాలతో వెంబడించడం సరికాదని వారు అభిప్రాయపడుతున్నారు.

2026 టీ20 ప్రపంచకప్ ఎంపికపై వసీం జాఫర్ విమర్శలు
వచ్చే నెలలో (ఫిబ్రవరి 7 నుంచి) భారత్, శ్రీలంక వేదికలుగా జరగనున్న టీ20 ప్రపంచకప్ 2026 కోసం బీసీసీఐ ఇప్పటికే 15 మంది సభ్యులతో కూడిన జట్టును ప్రకటించింది. అయితే వాషింగ్టన్ సుందర్ ఎంపికపై టీమిండియా మాజీ ఆటగాడు వసీం జాఫర్ అసంతృప్తి వ్యక్తం చేశారు. యశస్వి జైస్వాల్, జితేష్ శర్మ వంటి ప్రతిభావంతులను కాదని వాషింగ్టన్ సుందర్, ఇషాన్ కిషన్‌లను ఎంపిక చేయడంపై ఆయన ఆశ్చర్యం వ్యక్తం చేశారు. అక్షర్ పటేల్ వైస్ కెప్టెన్‌గా ఉన్నప్పుడు కుల్దీప్, వరుణ్ చక్రవర్తి వంటి స్పిన్నర్లు ఉండగా.. సుందర్‌కు తుది జట్టులో అవకాశం దక్కడం కష్టమని జాఫర్ పేర్కొన్నారు.

భారత్ vs న్యూజిలాండ్ సిరీస్ అప్‌డేట్స్
న్యూజిలాండ్‌తో జరగనున్న పరిమిత ఓవర్ల సిరీస్ జనవరి 11 నుంచి ప్రారంభం కానుంది. న్యూజిలాండ్ వన్డే సిరీస్ కోసం భారత జట్టును నేడు (జనవరి 3) ప్రకటించే అవకాశం ఉంది. ఈ జట్టులోకి రిషభ్ పంత్, మహమ్మద్ సిరాజ్ తిరిగి వచ్చే అవకాశం ఉండగా.. మహమ్మద్ షమీకి విశ్రాంతినిచ్చే సూచనలు కనిపిస్తున్నాయి. జనవరి 11 నుంచి 3 వన్డేలు, ఆ తర్వాత 5 టీ20లు జరగనున్నాయి.

టీ20 ప్రపంచకప్, న్యూజిలాండ్ సిరీస్ కోసం భారత జట్టు:(అంచనా)
సూర్యకుమార్ యాదవ్ (కెప్టెన్), అభిషేక్ శర్మ, సంజూ శాంసన్, తిలక్ వర్మ, హార్దిక్ పాండ్యా, శివం దూబే, అక్షర్ పటేల్ (వైస్ కెప్టెన్), రింకూ సింగ్, జస్ప్రీత్ బుమ్రా, హర్షిత్ రాణా, అర్ష్‌దీప్ సింగ్, కుల్దీప్ యాదవ్, వరుణ్ చక్రవర్తి, వాషింగ్టన్ సుందర్, ఇషాన్ కిషన్.

వాషింగ్టన్ సుందర్ తన ప్రవర్తనపై వస్తున్న విమర్శలపై ఇప్పటివరకు అధికారికంగా స్పందించలేదు. మైదానంలో నిలకడగా రాణిస్తున్న ఈ యువ ఆటగాడు, ఈ వివాదం నుంచి త్వరగా బయటపడి వరల్డ్ కప్‌లో సత్తా చాటాలని అభిమానులు కోరుకుంటున్నారు.