టెస్టు క్రికెట్‌కు బ్రేక్‌ ఇచ్చిన వహాబ్‌ రియాజ్.. ఇక గుడ్‌ బై చెప్పినట్లేనా?

పరిమిత ఓవర్ల క్రికెట్‌పై దృష్టి:

'మా కుటుంబ సభ్యులు, పాక్ బోర్డుతో చర్చలు జరిపా. ఇక టెస్టులకు నిరవధికంగా విరామం ఇవ్వాలని నిర్ణయించుకున్నా. ఫిట్‌నెస్‌పై దృష్టి పెట్టేందుకే టెస్ట్ క్రికెట్‌కు దూరంగా ఉండాలనుకుంటున్నా. నా దేశం కోసం పరిమిత ఓవర్ల క్రికెట్‌పై దృష్టి పెట్టా. ఇది చాలా కఠిన నిర్ణయమే. అయినా బోర్డు సభ్యుల మద్దతును అభినందిస్తున్నా' అని రియాజ్‌ తన ట్వీటర్‌ ఖాతాలో రాసుకొచ్చాడు.

గుడ్‌ బై చెప్పినట్లేనా?:

టెస్టు క్రికెట్‌కు బ్రేక్‌ ఇచ్చిన వహాబ్‌ రియాజ్ ఇంతకు టెస్టు కెరీర్‌కు గుడ్‌ బై చెప్పాడో లేదో మాత్రం క్లారిటీ ఇవ్వలేదు. అయితే గుడ్‌ బై చెప్పినట్లే అని పలువురు అంటున్నారు. రియాజ్ చివరిసారిగా 2018 అక్టోబర్‌లో ఆస్ట్రేలియాతో జరిగిన టెస్ట్‌లో పాల్గొన్నాడు. 2010లో టెస్ట్‌లోకి అడుగుపెట్టిన రియాజ్ పాకిస్తాన్ తరఫున 27 టెస్టులకు ప్రాతినిధ్యం వహించాడు. 34 ఏళ్ల వహాబ్ రియాజ్ 27 టెస్ట్ మ్యాచుల్లో 3.42 ఎకానమీతో 83 వికెట్లు తీసాడు. ఐదు వికెట్లు రెండు సార్లు తీసాడు. 5/63 ఇది రియాజ్ టెస్టుల్లో బెస్ట్ గణాంకాలు. అంతేకాదు బ్యాటుతో 2864 పరుగులు కూడా చేసాడు. 87 వన్డేల్లో 113 వికెట్లు.. 27టీ20ల్లో 28 వికెట్లు తీసాడు. 3903, 723 పరుగులు కూడా చేసాడు.

పాకిస్తాన్‌ క్రికెట్‌లో అలజడి:

ఇటీవల పాక్ స్టార్ పేసర్‌ మహ్మద్‌ అమిర్‌ టెస్టు కెరీర్‌కు గుడ్‌ బై చెప్పిన విషయం తెలిసిందే. ఆ సమయంలోనే వహాబ్‌ రియాజ్‌కు అమిర్‌ బాటలో ఉన్నాడనే వార్తలు వచ్చాయి. 'నీకు చాలా కెరీర్ ఉంది. కష్టకాలంలో ఉన్న పాక్‌ క్రికెట్‌ జట్టుకు అండగా ఉండాల్సింది పోయి రిటైర్మెంట్‌ ఇస్తున్నావ్. నీ తర్వాత రియాజే టెస్టులకు వీడ్కోలు చెప్పనున్నాడా' మాజీ పేసర్‌ షోయబ్‌ అక్తర్‌ మండిపడ్డాడు. ఇప్పుడు రియాజ్‌ చేసిన ట్వీట్‌ పాకిస్తాన్‌ క్రికెట్‌లో అలజడి రేపుతోంది.