అమీర్ ఖాన్ చాట్ షోలో కోహ్లీ: అనుష్క శర్మపై కీలక ప్రశ్న

కోహ్లీతో అమీర్ ఖాన్ చాట్ షో

చాట్ షోలో భాగంగా అమీర్ ఖాన్.. కెప్టెన్ కోహ్లీని కొన్ని ప్రశ్నలు అడిగాడు. ముఖ్యంగా బాలీవుడ్ నటి అనుష్క శర్మలో మీకు నచ్చేవి.. నచ్చని అంశాలు ఏమిటి అని అడిగాడు. ఇందుకు కోహ్లీ 'తన నిజాయతీ, జాగ్రత్తగా చూసుకునే స్వభావం ఎంతో నచ్చుతాయి. ఇక నచ్చనిది అంటే సమయపాలన. ఎప్పుడూ చెప్పిన టైంకి రాదు. 5-7 నిమిషాల పాటు లేట్‌గా వస్తుంది. కొంచమే కాబట్టి ఎప్పుడూ పెద్దగా ఇబ్బంది అనిపించలేదు' అని కోహ్లీ అన్నాడు.

‘చీకూ' అనే ముద్దుపేరు ఎలా వచ్చిందంటే

ఆ తర్వాత ‘చీకూ' అనే ముద్దుపేరు ఎలా వచ్చిందని ఆమిర్‌ అడిగాడు. ఇందుకు కోహ్లీ 'అండర్‌-17 క్రికెట్‌ ఆడే సమయంలో నా చెవులు చాలా పెద్దగా కనిపించేవి. పొడవాటి జట్టుతో వాటిని కప్పి ఉంచేవాడిని. నా హెయిర్‌ స్టైల్‌ చూసి మిగతా ఆటగాళ్లు ‘చీకూ రాబిట్‌' అంటూ పిలవడం మొదలుపెట్టారు. ఆ తర్వాత ధోని కూడా అలాగే పిలవడం ప్రారంభించాడు. ఒకసారి స్టంప్స్‌ వెనుక ఉన్న ధోని నన్ను చీకూ అని పిలవడం మైక్‌లో రికార్డయ్యింది. అలా ఆ పేరు ప్రచారంలోకి వచ్చింది' అని కోహ్లీ చెప్పుకొచ్చాడు.

కోహ్లీపై కేఎల్ రాహుల్ ఇలా

ఇదే చాట్ షోకి కోహ్లీతో పాటు జట్టు సహచరుడు కేఎల్ రాహుల్ కూడా వచ్చాడు. ఈ సందర్భంగా కోహ్లీలో తనకు నచ్చని, నచ్చిన విషయాలను రాహుల్ వెల్లడించాడు. ఫిట్‌‌నెస్ విషయంలో కోహ్లీ ఎంతో కఠినంగా ఉంటాడని, జట్టుని ఎంతో బాధ్యాతాయుతంగా నడిపిస్తాడని చెప్పాడు.

నచ్చిన సినిమాలపై కోహ్లీ

ఇక నచ్చని విషయానికి వస్తే ఛేజింగ్ రూమ్‌లో కోహ్లీ ఎల్లప్పుడూ షర్ట్ లేకుండా ఉంటాడని, ఫోన్‌లో ఎక్కువగా మాట్లాడుతూ ఉంటాడని అన్నాడు. చివర్లో తాను నటించిన వాటిలో ఇష్టమైన సినిమాలు ఏమిటని అడగ్గా.. ‘జో జీతా వహి సికిందర్‌', ‘త్రీఇడియట్స్‌', ‘పీకే' అని కోహ్లీ సమాధానమిచ్చాడు.

‘పీకే'లో అనుష్క నటించింది కదా

వెంటనే ఆమిర్‌ ఖాన్ నవ్వుతూ అవునవును నీకు ‘పీకే' ఇష్టమని నాకు తెలుసు. ఎందుకంటే అందులో అనుష్క నటించింది కదా అని నవ్వులు పూయించాడు. అనంతరం చివర్లో ఇద్దరూ కానుకలు ఇచ్చి పుచ్చుకున్నారు. ‘దంగల్‌' సినిమా కోసం ఫస్ట్‌ క్లాప్‌ కొట్టిన క్లాపర్‌ను ఆమిర్‌ కోహ్లీకి ఇవ్వగా తాను ధరించిన టీమిండియా జెర్సీని ఆమిర్‌కు కానుకగా ఇచ్చాడు.