కోహ్లీ నెం.1: రైనాను ఎత్తేసిన యూవీ, టోపీతో(పిక్చర్స్)

మెల్బోర్న్/దుబాయ్‌: ఆస్ట్రేలియా పర్యటనలో ఆతిథ్య జట్టుతో జరిగిన టీ20 సిరీస్‌ను 3-0తో స్వాధీనం చేసుకున్న టీమిండియా ఆటగాళ్లు ఆనందోత్సాహాలు జరుపుకున్నారు. ఆదివారం జరిగిన మూడో మ్యాచులో విజయం సాధించిన అనంతరం అజేయంగా నిలిచిన సురేష్ రైనా, యువరాజ్ సింగ్‌లు పరస్పరం అభినందించుకున్నారు.

ఆ తర్వాత రైనాను అమాంతం ఎత్తుకున్న యువరాజ్ విజయానందం వ్యక్తం చేశాడు. అనంతరం టీమిండియా ఆటగాళ్లందరూ మైదానంలోకి చేరి సంబరాలు చేశారు. పరస్పరం అభినందనలు తెలుపుకుంటూ ఆనందాన్ని పంచుకున్నారు.

ఐసిసి టీ20 ర్యాంకింగ్స్: కోహ్లీనే నెం.1

భారత్‌ స్టార్‌ బ్యాట్స్‌మెన్‌ విరాట్‌ కోహ్లి టీ20ల్లో నెంబర్‌ వన్‌ బ్యాట్స్‌మెన్‌గా నిలిచాడు. తాజాగా ఐసీసీ ప్రకటించిన టీ20 బ్యాట్స్‌మెన్ల ర్యాంకింగ్స్‌ జాబితాలో 892 పాయింట్లతో కోహ్లి అగ్రస్థానాన్ని కైవసం చేసుకోగా.. ఆస్ట్రేలియా బ్యాట్స్‌మెన్‌ అరోన్‌ ఫించ్‌ 868 పాయింట్లతో రెండో స్థానానికి పడిపోయాడు.

ఆస్ట్రేలియాతో జరిగిన మూడు మ్యాచ్‌ల టీ20 సిరీస్‌లో కోహ్లి వరుసగా 90, 59, 50 స్కోర్లు చేసి 3-0తో భారత్‌ సిరీస్‌ చేజిక్కించుకోవడంలో కీలకపాత్ర పోషించాడు. ఈ సిరీస్‌లోనే మెరుగైన బ్యాటింగ్‌తో రాణించిన సురేశ్‌ రైనా మూడు స్థానాలు ఎగబాకి 13వ స్థానంలో నిలవగా.. ఓపెనర్‌ రోహిత్‌ శర్మ నాలుగు స్థానాలను మెరుగుపరుచుకుని 16వ స్థానంలో నిలిచాడు.

టీ20 బౌలింగ్‌ విభాగంలో స్పిన్నర్‌ రవిచంద్రన్‌ అశ్విన్‌ 692 పాయింట్లతో ద్వితీయ స్థానంలో నిలవగా.. వివాదాస్పద బౌలింగ్‌ శైలితో నిషేధం ఎదుర్కొంటున్న వెస్టిండీస్‌ స్పిన్నర్‌ సునీల్‌ నరైన్‌ 773 పాయింట్లతో అగ్రస్థానంలో కొనసాగుతున్నాడు. అశ్విన్‌ మినహా భారత్‌ బౌలర్లు ఎవరూ టాప్‌-10లో చోటు దక్కించుకోలేకపోయారు.