ద్రావిడ్ పై విజయ్ మాల్యా విసుర్లు

బెంగుళూర్: తన ఐపియల్ ట్వంటీ 20 క్రికెట్ జట్టు కెప్టెన్ రాహుల్ ద్రావిడ్ పై బెంగుళూర్ రాయల్ ఛాలెంజర్స్ జట్టు యజమాని విజయ్ మాల్యా విమర్శలు గుప్పించారు. రాహుల్ ద్రావిడ్, చారుశర్మ తన కొంప ముంచారని ఆయన అన్నారు. జట్టు సభ్యుల ఎంపిక విషయంలో వారిద్దరు తనను తప్పుదారి పట్టించారని ఆయన విమర్శించారు. జట్టు ఎంపిక పూర్తయిన తర్వాత ట్వంటీ 20 మ్యాచులకు టెస్టు జట్టును ఎంపిక చేసుకున్నావని తన మిత్రులు అన్నారని ఆయన చెప్పుకున్నారు.

తీరిక దొరికినప్పుడు క్రికెట్ మ్యాచ్ లు చూసే అలవాటు తనకు ఉన్నదని, తాను ఎంపిక చేసుకోవాల్సిన క్రికెటర్ల జాబితాను తాను తయారు చేసుకున్నానని, అయితే ద్రావిడ్, చారు శర్మ వారి ఎంపికను పడనీయలేదని ఆయన అన్నారు. జట్టు ఎంపికలో దొర్లిన తప్పుల వల్లనే వరుస వైఫల్యాలు ఎదురవుతున్నాయని ఆయన అభిప్రాయపడ్డారు. కెప్టెన్ ఇష్టప్రకారమే జట్టు ఎంపిక జరిగిందని, దురదృష్టవశాత్తు క్రికెట్ క్రీడలో కెప్టెనే బాస్ అని ఆయన అన్నారు. తప్పుల వల్లనే చారుశర్మను తప్పించి బ్రిజేష్ పటేల్ ను ఎంపిక చేసుకున్నట్లు ఆయన తెలిపారు.