బుడ్డోడికి పెద్ద బహుమతి!: లైసెన్స్ లేదు కానీ లగ్జరీ కారు వచ్చేసింది!

Vaibhav Suryavanshi: ఐపీఎల్ 2025 సీజన్లో అతి పిన్న వయసులోనే అరంగేట్రం చేసి తన మెరుపు ఇన్నింగ్స్‌లతో ప్రపంచ క్రికెట్ దృష్టిని ఆకర్షించిన బీహార్ యువ కెరటం వైభవ్ సూర్యవంశీకి అరుదైన గౌరవం దక్కింది. ఈ సీజన్లో అత్యంత వేగంగా పరుగులు సాధించినందుకు గాను అతనికి "సూపర్ స్ట్రైకర్ ఆఫ్ ది సీజన్" అవార్డు లభించింది. ఈ ఘనత సాధించినందుకు ప్రముఖ వాహన తయారీ సంస్థ టాటా మోటార్స్, వైభవ్‌కు తమ లేటెస్ట్ మోడల్ 'టాటా కర్వ్' కారును బహుమతిగా అందజేసింది. వైభవ్ సూర్యవంశీ ప్రదర్శించిన విధ్వంసకర బ్యాటింగ్‌కు ఈ లగ్జరీ కారు ఓ గుర్తింపుగా నిలిచింది.

కుటుంబంతో కలిసి కారు డెలివరీ
తాజాగా బీహార్ రాజధాని పాట్నాలోని టాటా షోరూంలో వైభవ్ సూర్యవంశీ తన తండ్రి, చిన్న తమ్ముడితో కలిసి ఈ కొత్త కారును డెలివరీ తీసుకున్నారు. ఈ సందర్భంగా షోరూం సిబ్బంది వైభవ్ కుటుంబానికి ఘనస్వాగతం పలికారు. షోరూంలో ఏర్పాటు చేసిన చిన్న వేడుకలో కారుపై ఉన్న ముసుగును తొలగించి కేక్ కట్ చేసి ఈ సంతోషకరమైన క్షణాన్ని జరుపుకున్నారు. అయితే వైభవ్ సూర్యవంశీ వయస్సు ప్రస్తుతం 18 ఏళ్ల లోపే ఉండటంతో అతనికి డ్రైవింగ్ లైసెన్స్ లేదు. దీనివల్ల కారును చూడటానికి, అందులో కూర్చోవడానికి ముచ్చటపడినప్పటికీ.. ప్రస్తుతానికి దానిని అతను సొంతంగా నడిపే అవకాశం లేదు.

ఐపీఎల్ 2025లో రికార్డుల వేట
కేవలం 13 ఏళ్ల వయసులోనే ఐపీఎల్ వంటి భారీ టోర్నీలో ఆడి చరిత్ర సృష్టించిన వైభవ్.. గత సీజన్‌లో ఆడిన 7 మ్యాచ్‌ల్లో 252 పరుగులు సాధించాడు. అతని బ్యాటింగ్ సగటు 36.00 కాగా.. అన్నింటికంటే ముఖ్యంగా వైభవ్ సూర్యవంశీ స్ట్రైక్ రేట్ 206.55గా నమోదైంది. సీజన్ మొత్తంలో ఇంతటి భారీ స్ట్రైక్ రేట్‌తో మరే ఇతర బ్యాటర్ పరుగులు చేయకపోవడం విశేషం. మొత్తం 122 బంతులను ఎదుర్కొన్న ఈ యువ లెఫ్ట్ హ్యాండ్ బ్యాటర్ 24 సిక్సర్లు, 18 ఫోర్లతో ప్రత్యర్థి బౌలర్లపై విరుచుకుపడ్డాడు. ఈ అసాధారణ ప్రతిభే అతనికి "సూపర్ స్ట్రైకర్" బిరుదును తెచ్చిపెట్టింది.

టాటా కర్వ్ ఫీచర్లు, ధర
వైభవ్ సూర్యవంశీ అందుకున్న టాటా కర్వ్ కారు ప్రస్తుతం మార్కెట్లో అత్యంత స్టైలిష్ ఎస్‌యూవీ-కూపే మోడల్స్‌లో ఒకటిగా ఉంది. స్లోపింగ్ రూఫ్‌లైన్, ఫుల్ ఎల్ఈడీ లైట్ బార్, స్పోర్టీ అల్లాయ్ వీల్స్‌తో ఈ కారు ఎంతో ఆకర్షణీయంగా ఉంటుంది. ఇంటీరియర్‌ విషయానికొస్తే.. పెద్ద టచ్‌స్క్రీన్ ఇన్ఫోటైన్‌మెంట్, వైర్‌లెస్ ఛార్జింగ్, వెంటిలేటెడ్ సీట్లు, ADAS వంటి అత్యాధునిక సేఫ్టీ ఫీచర్లు ఇందులో ఉన్నాయి. ఈ కారు పెట్రోల్ వెర్షన్ ప్రారంభ ధర సుమారు రూ. 9.99 లక్షలు (ఎక్స్-షోరూమ్) ఉండగా.. టాప్ ఎండ్, ఎలక్ట్రిక్ మోడల్స్ ధరలు రూ.22 లక్షల వరకు పలుకుతున్నాయి.