11 బంతుల్లో 5 ఫోర్లు, 5 సిక్సర్లు.. దుమ్మురేపిన వైభవ్ సూర్యవంశీ! (వీడియో)

IND vs SL: శ్రీలంక ఎ జట్టుతో జరిగిన ముక్కోణపు సిరీస్ ఫైనల్ మ్యాచ్‌లో భారత యువ ఓపెనర్ వైభవ్ సూర్యవంశీ విధ్వంసకర ఇన్నింగ్స్‌తో చెలరేగిపోయాడు. మైదానంలోకి అడుగుపెట్టిన క్షణం నుంచే ప్రత్యర్థి బౌలర్లపై తారస్థాయిలో విరుచుకుపడుతూ, కేవలం 11 బంతుల్లోనే హాఫ్ సెంచరీ పూర్తి చేసి సంచలనం సృష్టించాడు. ఈ అద్భుత ప్రదర్శనతో టైటిల్ పోరులో లంక జట్టును తేరుకోలేని దెబ్బ తీశాడు.

నిజానికి ఈ ఉత్కంఠభరిత మ్యాచ్‌కు ముందు లీగ్ దశలో శ్రీలంకతో జరిగిన మ్యాచ్‌లో సూపర్ ఓవర్ ముగిసిన తర్వాత ఇరు జట్ల ఆటగాళ్ల మధ్య తీవ్రమైన వాగ్వాదం జరిగింది. ఆ సమయంలో శ్రీలంక ఆటగాళ్లు వైభవ్‌ను స్లెడ్జింగ్ చేస్తూ అవమానించేలా ప్రవర్తించారు. ఈ ప్రతిష్టాత్మక ఫైనల్ పోరులో నోటి మాటలతో కాకుండా తన పదునైన బ్యాట్‌తోనే లంక బౌలర్లకు బుద్ధి చెప్పాలని నిర్ణయించుకున్న వైభవ్ సూర్యవంశీ లంక బౌలింగ్‌ను చీల్చిచెండాడాడు.

శ్రీలంక బౌలర్లపై వైభవ్ సూర్యవంశీ వీరవిహారం
భారత జట్టు ఇన్నింగ్స్ మూడో ఓవర్లో లంక ప్రధాన బౌలర్ మహ్మద్ షిరాజ్ బౌలింగ్‌కు రాగా.. వైభవ్ సూర్యవంశీ ఒక్కసారిగా గేర్ మార్చాడు. ఆ ఓవర్‌లో మొదటి బంతికి డీప్ మిడ్-వికెట్ దిశగా ఫోర్ కొట్టిన వైభవ్.. ఆ తర్వాత తదుపరి రెండు బంతులకు వరుసగా లెగ్ సైడ్, ఎక్స్‌ట్రా కవర్ మీదుగా గగనతల సిక్సర్లు బాదాడు. ఆ తర్వాత మరో సిక్సర్, ఆఖరి బంతికి మిడ్-ఆఫ్ దిశగా ఫోర్ కొట్టడంతో ఆ ఒక్క ఓవర్‌లోనే ఏకంగా 26 పరుగులు లభించాయి.

ఆ తర్వాత బౌలింగ్‌కు వచ్చిన దులాజ్ సముదిత బౌలింగ్‌లోనూ వైభవ్ సూర్యవంశీ తన అటాకింగ్ గేమ్‌ను కొనసాగించాడు. వరుసగా ఫోర్, సిక్స్ కొట్టి కేవలం 10 బంతుల్లోనే 44 పరుగుల మైలురాయిని చేరుకున్నాడు. ఆ తర్వాతి స్లోయర్ డెలివరీని లాంగ్ ఆన్ మీదుగా అద్భుతమైన సిక్సర్‌గా మలిచి కేవలం 11 బంతుల్లోనే తన చారిత్రక హాఫ్ సెంచరీని పూర్తి చేశాడు. ఆ వెంటనే తర్వాతి బంతికి ఫోర్‌తో లంక జట్టును మరింత ఒత్తిడిలోకి నెట్టాడు.ఈ అసాధారణ ఇన్నింగ్స్ ద్వారా వైభవ్ సూర్యవంశీ కేవలం పరుగుల వరద పారించడమే కాకుండా, మైదానంలో ఎదురైన గత పరాభావానికి గట్టిగా ప్రతీకారం తీర్చుకున్నాడు. లంక ఆటగాళ్లు విసిరిన సవాలును స్వీకరించి, ఒత్తిడిని అధిగమించి మ్యాచ్ గెలిపించే ఇన్నింగ్స్ ఆడాడు. ఫైనల్ లాంటి పెద్ద వేదికపై లంక బౌలింగ్ విభాగాన్ని ముక్కలు ముక్కలు చేస్తూ వైభవ్ ఆడిన ఈ ఇన్నింగ్స్ క్రికెట్ ప్రపంచంలో హాట్ టాపిక్‌గా మారింది.
యువ క్రికెటర్లలో అతడి మానసిక దృఢత్వం, ప్రతిభ భారత క్రికెట్ భవిష్యత్తుపై కొత్త ఆశలను రేకెత్తిస్తున్నాయి.