రాజస్థాన్ రాయల్స్ కాదు.. బుడ్డోడి ఫేవరెట్ ఐపీఎల్ టీమ్ అదే! (వీడియో)

Vaibhav Sooryavanshi: ఐపీఎల్ 2026 సీజన్లో తన విధ్వంసకర బ్యాటింగ్‌తో యావత్ క్రికెట్ ప్రపంచాన్ని ఆకర్షించిన యువ ఆటగాడు వైభవ్ సూర్యవంశీ.. తాజాగా టీమిండియా టీ20 జట్టులో స్థానం సంపాదించి సరికొత్త రికార్డు సృష్టించాడు. కేవలం 15 ఏళ్ల వయసులోనే టీమిండియాకు ఎంపికైన వైభవ్ సూర్యవంశీ.. ఐపీఎల్‌లో రాజస్థాన్ రాయల్స్ తరఫున ఆడుతున్నాడు. ఐపీఎల్ 2025లో అరంగేట్రం చేసిన ఈ యువ సెన్సేషన్, 2026 సీజన్లో అద్భుత ప్రదర్శనతో 'ఆరెంజ్ క్యాప్'ను కైవసం చేసుకున్నాడు. ఈ ఘనతతోనే వైభవ్ సూర్యవంశీకి ఇంగ్లాండ్, ఐర్లాండ్ పర్యటనలకు టీమిండియాలో అవకాశం లభించింది. అయితే, రాజస్థాన్ రాయల్స్ జట్టు తరఫున ఆడటానికి ముందు తాను ఏ ఐపీఎల్ టీమ్‌కు వీరాభిమాని అనే విషయాన్ని వైభవ్ సూర్యవంశీ తాజాగా ఓ ఇంటర్వ్యూలో బయటపెట్టాడు.

రాజస్థాన్ రాయల్స్ తన అధికారిక సోషల్ మీడియా ఖాతాలో వైభవ్ సూర్యవంశీ ఇంటర్వ్యూకి సంబంధించిన ఓ వీడియోను పోస్ట్ చేసింది. అందులో వైభవ్ సూర్యవంశీ మాట్లాడుతూ.. ఐపీఎల్ అరంగేట్రానికి ముందు తాను ఆర్సీబీ జట్టుకు వీరాభిమానినని వెల్లడించాడు. దీనికి గల కారణాన్ని కూడా చెప్తూ తాను విరాట్ కోహ్లీకి అభిమాని కావడమే ఆర్సీబీని సపోర్ట్ చేయడానికి ముఖ్య కారణమని వెల్లడించాడు. రాజస్థాన్ రాయల్స్ జట్టులో చేరకముందు నుంచి విరాట్ కోహ్లీ భయ్యా ఆటను తాను ఎంతగానో ఆరాధించేవాడినని ఈ యువ క్రికెటర్ పేర్కొన్నాడు.

ఈ సందర్భంగా రన్ మెషీన్ విరాట్ కోహ్లీని తొలిసారి కలుసుకున్న అనుభవాన్ని వైభవ్ సూర్యవంశీ పంచుకున్నాడు. "విరాట్ భయ్యా నా భుజంపై చేయి వేసి మాట్లాడినప్పుడు, నిజాయితీగా చెప్పాలంటే నాకదొక కలలా అనిపించింది. ప్రపంచంలోనే అంతటి గొప్ప సూపర్‌స్టార్‌తో మాట్లాడుతున్నాననే భావనే నాకు కలగలేదు. నా సొంత పెద్దన్నయ్యతో మాట్లాడుతున్నట్లే చాలా సౌకర్యంగా అనిపించింది. ఆయన నాతో ఎన్నో విషయాలు పంచుకున్నారు; నా బ్యాటింగ్‌లో ఏయే లోపాలు సరిదిద్దుకోవాలో వివరించారు. ఎప్పుడూ ఆటపైనే దృష్టి పెట్టాలని, ముందుకు సాగాలని సలహా ఇచ్చారు. నా జీవితంలో ఆ క్షణం ఎప్పటికీ చాలా ప్రత్యేకమైనది" అని వైభవ్ సూర్యవంశీ ఉద్వేగంగా చెప్పాడు.

అతి చిన్న వయసులోనే వైభవ్ సూర్యవంశీని టీమిండియా టీ20 జట్టులోకి ఎంపిక చేయడంపై టీమిండియా చీఫ్ సెలెక్టర్ అజిత్ అగార్కర్ స్పందించారు. ఐర్లాండ్, ఇంగ్లాండ్ సిరీస్‌లకు వైభవ్ సూర్యవంశీని ఎంపిక చేయడం గురించి ఆయన మాట్లాడుతూ.. "వైభవ్ సూర్యవంశీ కనబరిచిన అసాధారణ ప్రదర్శనే మమ్మల్ని అతడిని ఎంపిక చేసేలా చేసింది. వయసులో అతను ఇంకా చాలా చిన్నవాడే కావచ్చు, కానీ గత రెండు ఐపీఎల్ సీజన్లలో అతను బ్యాటింగ్ చేసిన తీరు చూస్తే అతనిలోని అపారమైన ప్రతిభ స్పష్టంగా కనిపిస్తోంది. మిగతా అందరిలాగే మాకు కూడా వైభవ్ భవిష్యత్తుపై భారీ అంచనాలు ఉన్నాయి" అని అజిత్ అగార్కర్ ఆశాభావం వ్యక్తం చేశారు.