ICC ODI Rankings: 7ఏళ్ల తర్వాత తొలిసారి కోహ్లీ కోల్పోయాడు.. అప్డేటెడ్ వన్డే ర్యాంకులు ఇవే..!

Updated ICC ODI Rankings: Virat Kohli Dropped From Top 3 After Seven Years

2015తర్వాత అంటే సుమారు ఏడేళ్ల తర్వాత తొలిసారిగా ఐసీసీ మెన్స్ వన్డే బ్యాటింగ్ ర్యాంకింగ్స్‌లో భారత స్టార్ ప్లేయర్ విరాట్ కోహ్లీ మొదటి మూడు స్థానాల నుంచి దిగజారాడు. ఇంగ్లాండ్‌తో జరిగిన తొలి వన్డేలో దక్షిణాఫ్రికాకు చెందిన రాస్సీ వాన్ డర్ డస్సెన్ (117బంతుల్లో 134 పరుగులు) సెంచరీతో చెలరేగడంతో పాటు గత కొంతకాలంగా స్థిరమైన ప్రదర్శన చేస్తుండడంతో.. అతను కోహ్లీని అధిగమించి మూడో స్థానానికి చేరుకున్నాడు. ప్రస్తుతం రాస్సీ 74.95 సగటుతో వన్డేల్లో అత్యధిక సగటు కలిగిన ఆటగాడిగా కొనసాగుతున్నాడు. ఇక వన్డే బ్యాటింగ్ ర్యాంకింగ్స్‌లో నంబర్ 1 పొజిషన్లో బాబర్ ఆజామ్, రెండో స్థానంలో ఇమామ్-ఉల్-హక్ ఉన్నాడు.

రిషబ్ పంత్, హార్దిక్ పాండ్యా స్థానాలు మెరుగు..

ఇక విరాట్ కోహ్లీ ర్యాంకింగ్స్‌లో 4వ స్థానానికి పడిపోయాడు. 33ఏళ్ల కోహ్లీ.. 2011 నుంచి నంబర్ 5కంటే దిగువకు పడిపోలేదు. అతను చివరిసారిగా 2015 అక్టోబర్‌లో మొదటి మూడు స్థానాల నుంచి దిగజారాడు. ఇటీవల టెస్ట్‌లో సైతం టాప్ 10లో నుంచి కోహ్లీ దిగజారాడు. ఇక బ్యాటింగ్ ర్యాంకింగ్స్‌లో రిషబ్ పంత్ బాగా మెరుగయ్యాడు. ఇంగ్లాండ్‌తో జరిగిన మూడో వన్డేలో పంత్ (125పరుగులు నాటౌట్) మ్యాచ్ విన్నింగ్ ఇన్నింగ్స్ ఆడిన పంత్ 25స్థానాలు ఎగబాకి 52వ స్థానానికి చేరుకున్నాడు. అలాగే హార్దిక్ పాండ్యా 55బంతుల్లో 71పరుగులు చేసి విలువైన ఇన్నింగ్స్ ఆడడంతో 42వ స్థానానికి చేరుకున్నాడు.

మున్నాళ్ల ముచ్చటగా బుమ్రా అగ్రస్థానం

ఇక ఇంగ్లాండ్‌తో జరిగిన మూడో వన్డేలో 4 వికెట్లు తీసిన పాండ్యా 25స్థానాలు ఎగబాకి 8వ స్థానానికి చేరుకున్నాడు. బౌలర్ల ర్యాంకింగ్స్‌లో జస్ప్రీత్ బుమ్రా తొలి వన్డేలో ఆరు వికెట్లు పడగొట్టి అగ్రస్థానానికి చేరుకున్న సంగతి తెలిసిందే. అయితే మూడో మ్యాచ్‌లో అతను ఆడకపోవడంతో మళ్లీ నంబర్ 2కి పడిపోయాడు. ట్రెంట్ బౌల్ట్ ప్రస్తుతం అగ్రస్థానంలో కొనసాగుతున్నాడు.