దాయాదుల పోరు: టాస్ గెలిచిన భారత్

క్రికెట్ ఫ్యాన్స్ ఎప్పుడెప్పుడా అని ఎదురుచూస్తున్న క్షణం రానే వచ్చింది. అండర్-19 ఆసియా కప్ వన్డే టోర్నీ తుది పోరులో భారత్, పాకిస్థాన్ జట్లు తలపడుతున్నాయి. ఈ హై-వోల్టేజ్ మ్యాచ్‌లో టాస్ గెలిచిన భారత కెప్టెన్ ఆయుష్ మాత్రే మొదట బౌలింగ్ ఎంచుకున్నాడు. పిచ్ పరిస్థితులను అనుకూలంగా మార్చుకుని ప్రత్యర్థిని తక్కువ పరుగులకే కట్టడి చేయాలనే వ్యూహంతో టీమిండియా బరిలోకి దిగుతోంది.

టీమిండియా అప్రతిహత ప్రస్థానం
ఈ టోర్నీలో భారత జట్టు తిరుగులేని ఫామ్‌లో ఉంది. ఆడిన ప్రతి మ్యాచ్‌లోనూ ఆధిపత్యాన్ని ప్రదర్శిస్తూ ఫైనల్‌కు చేరుకుంది. గ్రూప్-ఎలో ఆడిన అన్ని మ్యాచ్‌ల్లోనూ భారత్ ఘనవిజయాలు సాధించింది. ముఖ్యంగా పాకిస్థాన్‌తో జరిగిన లీగ్ మ్యాచ్‌లో 90 పరుగుల భారీ తేడాతో విజయం సాధించి మానసిక పైచేయి సాధించింది. శ్రీలంకతో జరిగిన సెమీస్‌లో భారత్ అన్ని విభాగాల్లో రాణించి 8 వికెట్ల తేడాతో విజయం సాధించి ఫైనల్‌కు దూసుకెళ్లింది.

పాకిస్థాన్‌కు సవాల్
మరోవైపు పాకిస్థాన్ జట్టు కూడా గట్టి పోటీనిస్తూ ఫైనల్‌కు చేరింది. సెమీఫైనల్‌లో డిఫెండింగ్ ఛాంపియన్ బంగ్లాదేశ్‌ను ఓడించి ఆత్మవిశ్వాసంతో ఉంది. అయితే, గ్రూప్ దశలో భారత్ చేతిలో ఎదురైన పరాజయానికి ప్రతీకారం తీర్చుకోవాలని పాక్ యువ జట్టు భావిస్తోంది. భారత జట్టులో ఓపెనర్ వైభవ్ సూర్యవంశీ, డబుల్ సెంచరీ హీరో అభిజ్ఞాన్ కుందుపై భారీ అంచనాలు ఉన్నాయి. బౌలింగ్‌లో కనిష్క్ చౌహాన్ కీలక వికెట్లు తీస్తూ ప్రత్యర్థిని దెబ్బతీస్తున్నాడు. 12వ సారి ఆసియా కప్ టైటిల్‌ను ముద్దాడాలని భారత్ పట్టుదలగా ఉంది. దుబాయ్‌లో వాతావరణం బౌలింగ్‌కు సహకరిస్తుండటంతో, భారత బౌలర్లు పాకిస్థాన్‌ను ప్రారంభంలోనే దెబ్బతీస్తారో లేదో చూడాలి.

మ్యాచ్ హైలైట్స్:
వేదిక: దుబాయ్ ఇంటర్నేషనల్ క్రికెట్ స్టేడియం.

టాస్: భారత్ గెలిచి బౌలింగ్ ఎంచుకుంది.

లక్ష్యం: రికార్డు స్థాయిలో 12వ ఆసియా కప్ టైటిల్.

తుది జట్లు:
ఇండియా అండర్19 (ప్లేయింగ్ XI): ఆయుష్ మాత్రే(కెప్టెన్), వైభవ్ సూర్యవంశీ, ఆరోన్ జార్జ్, విహాన్ మల్హోత్రా, వేదాంత్ త్రివేది, అభిజ్ఞాన్ కుందు(వికెట్ కీపర్), కనిష్క్ చౌహాన్, హెనిల్ పటేల్, ఖిలాన్ పటేల్, దీపేష్ దేవేంద్రన్, కిషన్ కుమార్ సింగ్

పాకిస్థాన్ అండర్19 (ప్లేయింగ్ XI): సమీర్ మిన్హాస్, ఉస్మాన్ ఖాన్, అహ్మద్ హుస్సేన్, ఫర్హాన్ యూసఫ్(కెప్టెన్), హంజా జహూర్(వికెట్ కీపర్), హుజైఫా అహ్సన్, నికాబ్ షఫీక్, మహ్మద్ షయాన్, అలీ రజా, అబ్దుల్ సుభాన్, మహ్మద్ సయామ్