ఆసియా కప్ ఫైనల్: పాకిస్థాన్‌తో భారత్ ఢీ.. అందరి కళ్లు అతడిపైనే!

U19 Asia Cup Final: క్రికెట్ క్రీడా ప్రపంచంలో అత్యంత ఉత్కంఠభరితమైన భారత్- పాకిస్థాన్ పోరుకు సర్వం సిద్ధమైంది. ఐసీసీ అండర్-19 ఆసియా కప్ ఫైనల్లో ఆదివారం ఉదయం 10.30 గంటలకు(కాసేపట్లో) భారత యువ జట్టు చిరకాల ప్రత్యర్థి పాకిస్థాన్‌తో తలపడనుంది. రికార్డు స్థాయిలో 12వ సారి ఆసియా కప్ టైటిల్‌ను ముద్దాడాలని ఆయుష్ మాత్రే నేతృత్వంలోని టీమిండియా పట్టుదలతో ఉంది.

టీమిండియా జోరు.. దాయాదిపై పైచేయి
ఈ టోర్నీలో టీమిండియా అప్రతిహత విజయాలతో దూసుకుపోతోంది. గ్రూప్-ఏలో ఆడిన అన్ని మ్యాచ్‌ల్లోనూ విజయం సాధించి పాయింట్ల పట్టికలో అగ్రస్థానంలో నిలిచింది. విశేషమేమిటంటే.. గ్రూప్ దశలో పాకిస్థాన్‌ను 90 పరుగుల తేడాతో భారత్ చిత్తు చేసింది. సెమీఫైనల్‌లో శ్రీలంకపై 8 వికెట్ల తేడాతో భారీ విజయాన్ని సాధించి ఫైనల్‌కు చేరుకోగా.. పాకిస్థాన్ డిఫెండింగ్ ఛాంపియన్ బంగ్లాదేశ్‌ను ఓడించి తుది పోరుకు అర్హత సాధించింది.

స్టార్ యువ ప్లేయర్లపై భారీ అంచనాలు

భారత బ్యాటింగ్ విభాగం ఈ టోర్నీలో ప్రత్యర్థులకు చుక్కలు చూపిస్తోంది. ముఖ్యంగా ఇద్దరు ఆటగాళ్లపై భారీ అంచనాలు ఉన్నాయి. తన విధ్వంసకర బ్యాటింగ్‌తో ప్రత్యర్థులను వణికిస్తున్న వైభవ్ సూర్యవంశీ.. యూఏఈపై కేవలం 95 బంతుల్లోనే 171 పరుగులు చేశాడు. ఫైనల్‌లో అతను డబుల్ సెంచరీ సాధిస్తాడని అభిమానులు ఆశిస్తున్నారు. వికెట్ కీపర్ బ్యాటర్ అయిన అభిజ్ఞాన్ కుందు.. మలేషియాపై 125 బంతుల్లో అజేయంగా 209 పరుగులు చేసి చరిత్ర సృష్టించాడు. యువ వన్డేల్లో డబుల్ సెంచరీ చేసిన తొలి భారతీయుడిగా రికార్డుకెక్కాడు. వీరితో పాటు మిడిల్ ఆర్డర్‌లో హైదరాబాద్‌కు చెందిన ఆరోన్ జార్జ్ వరుసగా మూడు హాఫ్ సెంచరీలు బాది జట్టుకు వెన్నెముకలా నిలిచాడు. ఆల్‌రౌండర్ కనిష్క్ చౌహాన్ అటు బ్యాట్‌తోనూ, ఇటు బంతితోనూ అద్భుత ఫామ్‌లో ఉన్నాడు.

పాకిస్థాన్ బలం.. బలహీనతలు
పాకిస్థాన్ జట్టు ప్రధానంగా తన ఫాస్ట్ బౌలింగ్‌పైనే ఆధారపడి ఉంది. అబ్దుల్ సుభాన్, అలీ రజా వంటి బౌలర్లు ప్రమాదకరంగా మారే అవకాశం ఉంది. అయితే వారి బ్యాటింగ్ విభాగం నిలకడలేమితో సతమతమవుతోంది. 2012లో ఒకసారి ఛాంపియన్‌గా నిలిచిన పాకిస్థాన్.. ఆ తర్వాత రెండుసార్లు రన్నరప్‌తోనే సరిపెట్టుకుంది. భారత జట్టు ఉన్న ఫామ్‌ను చూస్తుంటే పాక్ మరోసారి రన్నరప్‌కే పరిమితం కాక తప్పదనిపిస్తోంది.

మ్యాచ్ సమయం
భారత్, పాకిస్థాన్ మధ్య జరిగే ఈ హై-వోల్టేజ్ ఫైనల్ మ్యాచ్ ఆదివారం ఉదయం 10:30 గంటలకు(కాసేపట్లో) ప్రారంభం కానుంది. మరికొద్దిసేపట్లో ప్రారంభం కానున్న ఈ పోరులో భారత్ తన ఆధిపత్యాన్ని చాటుకుని మరోసారి ఆసియా కప్ విజేతగా నిలుస్తుందని విశ్లేషకులు భావిస్తున్నారు.

జట్లు (Squads)
భారత జట్టు: ఆయుష్ మాత్రే (కెప్టెన్), వైభవ్ సూర్యవంశీ, విహాన్ మల్హోత్రా (వైస్ కెప్టెన్), వేదాంత్ త్రివేది, అభిజ్ఞాన్ కుందు (వికెట్ కీపర్), హర్వంశ్ సింగ్ (వికెట్ కీపర్), యువరాజ్ గోహిల్, కనిష్క్ చౌహాన్, ఖిలాన్ ఏ పటేల్, నమన్ పుష్పక్, డి. దీపేష్, హెనిల్ పటేల్, కిషన్ కుమార్ సింగ్, ఉధవ్ మోహన్, ఆరోన్ జార్జ్.

పాకిస్థాన్ జట్టు: ఫర్హాన్ యూసుఫ్ (కెప్టెన్), ఉస్మాన్ ఖాన్ (వైస్ కెప్టెన్), అబ్దుల్ సుభాన్, అహ్మద్ హుస్సేన్, అలీ హసన్ బలోచ్, అలీ రజా, దానియల్ అలీ ఖాన్, హమ్జా జహూర్ (వికెట్ కీపర్), హుజైఫా అహసన్, మోమిన్ కమర్, మహమ్మద్ సయ్యమ్, మహమ్మద్ షాయన్ (వికెట్ కీపర్), నకాబ్ షఫీక్, సమీర్ మిన్హాస్ మరియు మహమ్మద్ హుజైఫా.