నవ్వాపుకొంటున్నావ్ కదరా..!!

శుభ్‌మన్ గిల్ సారథ్యంలోని గుజరాత్ టైటాన్స్ (GT) ఐపీఎల్ 2026 ప్లేఆఫ్స్‌లో దాదాపుగా ఒక అడుగు వేసింది. మంగళవారం సన్‌రైజర్స్ హైదరాబాద్ (SRH)పై సాధించిన అద్భుతమైన 82 పరుగుల విజయం GTకి కీలకమైన 16 పాయింట్లను తెచ్చిపెట్టింది. సాధారణంగా, 12 మ్యాచ్‌లలో 16 పాయింట్స్‌ను ప్లేఆఫ్స్ బెర్త్ ఖరారు చేసుకునే మ్యాజిక్ నంబర్‌గా పరిగణిస్తారు. ఈ గెలుపుతో ఇతర జట్ల ప్లేఆఫ్స్ అవకాశాల్లో గణనీయమైన మార్పులు చోటుచేసుకున్నాయి.

IPL అధికారిక బ్రాడ్‌కాస్టర్స్ అందించిన సమాచారం ప్రకారం, GT ప్లేఆఫ్స్‌కు అర్హత సాధించే సంభావ్యత 94.9 శాతానికి పెరిగింది. మరోవైపు, SRH అవకాశాలు 80 శాతం నుంచి 65.7 శాతానికి పడిపోయాయి. రాయల్ ఛాలెంజర్స్ బెంగళూరు (RCB) ప్లేఆఫ్స్ అవకాశాలు 80.1 శాతం నుంచి 79.7 శాతానికి తగ్గగా, చెన్నై సూపర్ కింగ్స్ (CSK) సంభావ్యత స్వల్పంగా 42.7 శాతం నుంచి 42.8 శాతానికి పెరిగింది. నాలుగో స్థానంలో ఉన్న పంజాబ్ కింగ్స్ (PBKS) అవకాశాలు కూడా 62.5 శాతం నుంచి 62.7 శాతానికి పెరిగాయి.

ఈ మ్యాచ్‌లో గుజరాత్ టైటాన్స్ ఆల్‌రౌండ్ ప్రదర్శనతో సన్‌రైజర్స్ హైదరాబాద్‌ను అధిగమించి పాయింట్ల పట్టికలో అగ్రస్థానానికి చేరుకుంది. మొదట బ్యాటింగ్ చేసిన టైటాన్స్, సాయి సుదర్శన్ (61), వాషింగ్టన్ సుందర్ (50) అర్ధ సెంచరీల తోడ్పాటుతో 168 పరుగులు చేసింది. బౌలింగ్‌లో ఎస్‌ఆర్‌హెచ్‌ పేసర్లు ప్రఫుల్ హింగ్ (2/17), పాట్ కమిన్స్ (1/20) కట్టుదిట్టంగా బౌలింగ్‌ చేశారు.

169 పరుగుల లక్ష్యాన్ని ఛేదించిన సన్‌రైజర్స్ హైదరాబాద్ 14.5 ఓవర్లలో కేవలం 86 పరుగులకే కుప్పకూలి భారీ తేడాతో ఓటమిపాలైంది. కగిసో రబాడా (3/28) SRH టాప్ ఆర్డర్‌ను దెబ్బతియ్యగా, జేసన్ హోల్డర్ (3/20) తనదైన శైలిలో రాణించాడు. ప్రసిద్ధ్ కృష్ణ (2/23), మహ్మద్ సిరాజ్ (1/11) కూడా వికెట్లు పడగొట్టి GT విజయంలో కీలక పాత్ర పోషించారు.

రబాడా తన వేగంతో SRH బ్యాట్స్‌మెన్‌లను ఉక్కిరిబిక్కిరి చేశాడు. ట్రావిస్ హెడ్ (క్యాచ్ ఔట్), అభిషేక్ శర్మ (బోల్డ్), ఆర్‌. స్మరన్ (క్యాచ్ ఔట్)లను పెవిలియన్‌కు పంపి సన్‌రైజర్స్ బ్యాటింగ్ లైనప్‌ను బద్దలు కొట్టాడు. పవర్‌ప్లేలో SRH కేవలం 32 పరుగులకే నాలుగు వికెట్లు కోల్పోయింది.

ఆ తర్వాత జేసన్ హోల్డర్ కూడా చెలరేగిపోయాడు. పేలవమైన బ్యాటింగ్ ప్రదర్శనతో హెన్రిచ్ క్లాసెన్ (14), నితీష్ కుమార్ రెడ్డి (2) వికెట్లను పడగొట్టి SRH ఆశలను అడియాశలు చేశాడు. కెప్టెన్ పాట్ కమిన్స్ (19) SRH బ్యాట్స్‌మెన్‌లలో అత్యధిక పరుగులు చేసిన ఆటగాడిగా నిలిచాడు. ఈ ఓటమితో సన్ రైజర్స్ హైదరాబాద్ ట్రోల్స్ బారిన పడింది. పెద్ద ఎత్తున సెటైర్లు పడుతున్నాయి. సన్ రైజర్స్ హైదరాబాద్ హేటర్స్ చెలరేగుతున్నారు.