చెన్నైని ఓడించిన ట్రినిడాడ్,ఇక సెమీస్ కష్టమే..

చెన్నై: చాంపియన్స్‌ లీగ్‌ ట్వంటీ-20 టోర్నమెం ట్‌లో చెన్నై సూపర్‌ కింగ్స్‌పై ట్రినిడాడ్‌ అండ్‌ టొబాగో జట్టు 12 పరుగుల తేడాతో విజయం సాధించింది. ఆదివారం జరిగిన చెన్నై చెపాక్ స్డేడియంలో జరిగిన మ్యాచ్‌లో ట్రినిడాడ్‌ 12 పరుగుల తేడాతో డిఫెండింగ్‌ చాంపియన్‌ చెన్నై సూపర్ కింగ్స్‌ను చిత్తుగా ఓడించింది. ఇక వివరాల్లోకి వెళితే టాస్ గెలిచి బ్యాటింగ్ ఎంచుకున్న ట్రినిడాడ్ అండ్ టుబాగో జట్టు 20 ఓవర్లలో 8 వికెట్ల నష్టానికి 123 పరుగులు చేసింది. ఓపెనర్లు సిమ్మన్స్ (33 బంతుల్లో 20; 1 ఫోర్), పెర్కిన్స్ (28 బంతుల్లో 34; 2 ఫోర్లు, 2 సిక్సర్లు) జట్టుకు మంచి ఆరంభాన్నిచ్చారు.

మధ్య ఓవర్లలో చెన్నై బౌలర్లు కట్టుదిట్టంగా బౌలింగ్ చేయడంతో... బరాత్ (22 బంతుల్లో 23; 2 ఫోర్లు) మినహా మిడిలార్డర్‌లో బ్యాట్స్‌మెన్ విఫలమయ్యారు. 92 పరుగులకు ఆరు వికెట్లు కోల్పోయిన కరీబియన్ జట్టును.. చివరి ఓవర్లలో కూపర్ (10 బంతుల్లో 28; 1 ఫోర్, 3 సిక్సర్లు) మెరుపు ఇన్నింగ్స్‌తో ఆదుకుని గౌరవప్రదమైన స్కోరును అందించాడు. కూపర్ జోరుతో ట్రినిడాడ్ చివరి ఐదు ఓవర్లలో 49 పరుగులు సాధించడం విశేషం. చెన్నై బౌలర్లలో బొలింజర్ మూడు వికెట్లు తీసుకోవడం జరిగింది.

ఆ తర్వాత 123 పరుగుల లక్ష్యంతో బ్యాటింగ్‌కు దిగిన చెన్నై సూపర్ కింగ్స్ వరుసగా వికెట్లు కోల్పోయింది. స్పిన్నర్‌ నారైన్‌ అద్భుత బౌలింగ్‌తో చెన్నై బ్యాట్స్‌మెన్‌ను హడలెత్తించాడు. నారైన్‌ 4 ఓవర్లలో 8పరుగులు మాత్రమే ఇచ్చి మూడు వికెట్లు పడగొట్టాడు. కూపర్‌, బద్రి కూడా పొదుపుగా బౌలింగ్‌ చేశారు. చెన్నై సూపర్ కింగ్స్ 20 ఓవర్లలో ఆరు వికెట్ల నష్టానికి 111 పరుగులు చేసి ఓడిపోయింది. స్పిన్నర్ నరైన్ (3/8) విజృంభించడంతో చెన్నై 27 పరుగులకే టాప్ ఆర్డర్ మూడు వికెట్లు కోల్పోయింది. బద్రీనాథ్ (15) మినహా మిడిలార్డర్‌లో ఎవరూ చెప్పుకోదగ్గ ఇన్నింగ్స్ ఆడలేదు. కెప్టెన్ ధోని ఏకంగా 22 బంతులు ఆడి ఏడు పరుగులు చేశాడు.