శ్రీలంకపై తొలి టెస్టు మ్యాచ్ లో వీరేందర్ సెహ్వాగ్ సెంచరీ

గాలె: శ్రీలంకపై జరుగుతున్న తొలి టెస్టు మ్యాచులో భారత ఓపెనర్ వీరేందర్ సెహ్వాగ్ అద్భుతమైన సెంచరీ చేశాడు. భారత్ తన తొలి ఇన్నింగ్స్ లో ఇబ్బందులో పడిన సమయంలో సెహ్వాగ్ సెంచరీ చేశాడు. దాంతో భారత్ కొంత కోలుకోగలిగింది. సెహ్వాగ్ తన సహజమైన శైలిలో ఆడి 101 పరుగులు చేశాడు. ఇందులో 18 ఫోర్లు, ఒక సిక్స్ ఉన్నాయి. టెస్టు మ్యాచుల్లో సెహ్వాగ్ కు ఇది 20వ సెంచరీ కాగా, శ్రీలంకపై నాలుగో సెంచరీ.

మూడు వికెట్లు కోల్పోయి 140 పరుగుల ఓవర్ నైట్ స్కోరుతో భారత్ మంగళవారం బ్యాటింగ్ కు దిగింది. భారత్ ఫాలో ఆన్ తప్పించుకోవడానికి మరో 200 పరుగులు చేయాల్సి ఉంటుంది. ఈ స్థితిలో సెహ్వాగ్ మరి కొంత సమయం క్రీజ్ లో ఉండాలని ఆశిస్తున్నారు. శ్రీలంక మూడో రోజు 8 వికెట్లకు 520 పరుగులు చేసి తొలి ఇన్నింగ్స్ ను డిక్లేర్ చేసింది. ఆ తర్వాత బ్యాటింగ్ కు దిగిన భారత్ స్వల్వ స్కోరుకే గౌతం గంభీర్, రాహుల్ ద్రావిడ్, సచిన్ టెండూల్కర్ వికెట్లను కోల్పోయింది. ప్రస్తుతం సెహ్వాగ్, వివియస్ లక్ష్మణ్ క్రీజులో ఉన్నారు.