అవేర్‌నేస్ ప్రోగ్రామ్‌.. విరాట్ కోహ్లీతో జూనియర్ ఎన్టీఆర్

ఎన్డీటీవీ అవేర్‌నేస్ ప్రోగ్రామ్‌:

ప్రతి రోజు మ‌ద్యం సేవించి వాహ‌నాలు నడిపే వారి సంఖ్య ఎక్కువైంది. మద్యం మత్తులో ఎంతోమంది ప్రాణాలు కోల్పోతున్నారు. దేశవ్యాప్తంగా ట్రాఫిక్ పోలీసులు పలు అవగాహనా కార్యక్రమాలు చేపట్టినా.. ఏ మాత్రం ఫలితం కనిపించడం లేదు. ఈ నేపథ్యంలో ప్ర‌జ‌ల్లో అవ‌గాహ‌న‌ను కల్పించేందుకు ఎన్డీటీవీ ఓ ప్రత్యేక కార్యక్రమాన్ని నిర్వహించాలని నిర్ణయించింది.

ఒకే వేదికపై కోహ్లీ, ఎన్టీఆర్:

ఈ కార్య్రక్రమంలో భాగంగా విరాట్ కోహ్లీ, ఎన్టీఆర్ చేతులు కలపనున్నారు. వీరితో పాటు పలు రంగాల్లోని మరో ఏడుగురు సెల‌బ్రిటీలు కూడా ప్ర‌చారక‌ర్త‌లుగా ప‌నిచేయ‌నున్నారని సమాచారం తెలుస్తోంది. మరో రెండు రోజుల్లో ఈ కార్యక్రమానికి సంబంధించి అధికారిక ప్ర‌క‌ట‌న వెలువడనుంది. సెల‌బ్రిటీలు అందరూ మ‌ద్యం మత్తులో జరిగే రోడ్డు ప్రమాదాలను అరికట్టేందుకు గాను తమ వంతు సహకారం అందించనున్నారు.

ఇప్పటికే ఎన్టీఆర్ అవగాహన:

కోహ్లీ, ఎన్టీఆర్ ప్రజా శ్రేయస్సు కోరుతూ అవేర్‌నెస్ ప్రోగ్రామ్‌ లో పాల్గొనడం అభినందించదగ్గ విషయం. భారీ ఫాలోయింగ్ ఉన్న కోహ్లీ, తారక్ లాంటి వారు సూచనలు ఇస్తే ప్రజల్లో మార్పు వచ్చే అవకాశం ఉంది. ఎన్టీఆర్ ఇప్పటికే ఈ విషయంపై అవగాహన కల్పిస్తున్నాడు. త‌న ప్ర‌తీ సినిమా ప్రారంభానికి ముందు వాయిస్ ఓవ‌ర్ రూపంలో తారక్‌ ఓ మెసేజ్ ఇస్తాడు. ప్రతి సినిమా ఈవెంట్లో కూడా తన అభిమానులను క్షేమంగా ఇంటికి వెళ్లాలని కోరుకుంటాడు.

ప్రపంచకప్‌లో కోహ్లీ:

అరవింద సమేత' లాంటి మంచి హిట్ కొట్టిన ఎన్టీఆర్ ప్రస్తుతం 'ఆర్ఆర్ఆర్' షూటింగ్ లో బిజీగా ఉన్నాడు. దర్శక ధీరుడు రాజమౌళి దర్శకత్వంలో ఈ సినిమా తెరకెక్కుతోంది. ఈ సినిమాలో 'మెగా పవర్ స్టార్' రాంచరణ్ కూడా మరో హీరో. మరోవైపు ప్రపంచకప్‌ టోర్నీలో విరాట్ కోహ్లీ బిజీగా ఉన్నాడు. టీమిండియా తన తదుపరి మ్యాచ్ శనివారం ఆఫ్ఘ‌నిస్తాన్‌తో ఆడనుంది.