లక్ష్మణ్ డబుల్ సెంచరీ: 613/7 డిక్లేర్డ్

న్యూఢిల్లీ: ఢిల్లీలోని ఫిరోజ్‌షా కోట్ల మైదానంలో ఆస్ట్రేలియాతో జరుగుతున్న మూడో టెస్ట్‌ తొలి ఇన్నింగ్సులో భారత ఆటగాళ్లు అద్భుతంగా రాణించారు. హైదరాబాదీ బాట్స్ మన్ వివియస్ లక్ష్మణ్ ఆస్ట్రేలియాపై తన సత్తా చాటాడు. డబుల్ సెంచరీ సాధించి అజేయంగా నిలిచాడు. ఆస్ట్రేలియాపై లక్ష్మణఅ కు ఇది రెండో డబుల్ సెంచరీ. భారత్ ఏడు వికెట్లు నష్టపోయి 613 పరుగులు వద్ద తన తొలి ఇన్నింగ్సును డిక్లేర్ చేసింది. డిక్లేర్ చేసే సమయానికి లక్ష్మణ్ 200 పరుగులతో, జహీర్ ఖాన్ 28 పరుగులతో అజేయంగా ఉన్నారు. కుంబ్లే అద్భుతంగా బ్యాటింగ్ చేసి 45 పరుగులు చేశాడు. జాన్సన్ మూడు వికెట్లు, వాట్సన్ రెండు వికెట్లు, బ్రెట్ లీ, కటిచ్ ఒక్కటేసి వికెట్లు తీసుకున్నారు.

ఆస్ట్రేలియాతో జరుగుతున్నమూడో టెస్టు తొలి ఇన్నింగ్సులో రెండో రోజు గురువారం ఓపెనర్ గౌతం గంభీర్ డబుల్ సెంచరీ సాధించాడు. 206 పరుగుల వ్యక్తిగత స్కోరు వద్ద గంభీర్ వాట్సన్ బౌలింగులో అవుటయ్యాడు. రెండో రోజున హైదరాబాద్ బ్యాట్స్‌మెన్ వీవీఎస్.లక్ష్మణ్ సెంచరీతో ఆకట్టుకున్నాడు. గంభీర్ అవుటైన తర్వాత బ్యాటింగుకు దిగిన సౌరవ్ గంగూలీ ఐదు పరుగులకే అవుటయ్యాడు. ధోనీ 27 పరుగులు చేసి పెవిలియన్ దారి పట్టాడు. అంతకుముందు తొలి రోజున సచిన్ (68) సహకారంతో గంభీర్ రెచ్చిపోయిన విషయం తెల్సిందే. తొలి రోజు ఇన్నింగ్స్ ముగిసే సమయానికి గంభీర్ 149 పరుగులతో క్రీజ్‌లో నాటౌట్‌గా నిలిచాడు. అలాగే లక్ష్మణ్ కూడా అర్థ శతకం (54) పూర్తి చేసుకుని గంభీర్‌కు మంచి సహకారం అందించారు. గురువారం రెండో రోజు ఆట ప్రారంభమైన తర్వాత గంభీర్-లక్ష్మణ్‌లు ఆచితూచి ఆడుతూ స్కోరును పెంచారు. వీరిద్దరు నాలుగో వికెట్‌కు 200 పరుగులకు పైగా భాగస్వామ్యాన్ని నెలకొల్పారు. ఆసీస్ కెప్టెన్ రికీ పాంటింగ్ బౌలర్లను మార్చిమార్చి ప్రయోగించిన గంభీర్ - లక్ష్మణ్ భాగస్వామ్యాన్ని విడదీయలేక పోయారు. దీంతో ఫిరోజ్‌షా కోట్ల మైదానంలో భారత ఆటగాళ్ళ పరుగుల వరద పారించారు.