Ind vs Zim 3rd ODI: సిరీస్ గెలిచాక కూడా ఎందుకింత సిల్లీగా ప్రవర్తిస్తారో.. జట్టు ఎంపికపై నెటిజన్ల బూతులు..!

The netizens were fired on the TeamIndia management for the team selection for the third ODI.

జింబాబ్వేపై ఇప్పటికే 2- 0 తేడాతో సిరీస్‌ కైవసం చేసుకున్న టీమిండియా మూడో వన్డేకు జట్టు కూర్పులో పలు ప్రయోగాలు చేస్తుందని అంతా భావించారు. అయితే కెప్టెన్ కేఎల్ రాహుల్ మాత్రం.. పెద్ద షాకిచ్చాడు. కేవలం బౌలింగ్ యూనిట్లో రొటేషన్ పాలసీని మాత్రమే కొనసాగించాడు. బెంచ్ మీద పడిగాపులు కాస్తున్న రాహుల్ త్రిపాఠి, షాబాజ్ అహ్మద్‌, రుతురాజ్ గైక్వాడ్‌లను మళ్లీ బెంచ్ మీద నుంచి కదలనీయలేదు. ఇప్పటికే సిరీస్ గెలిచినా తుది జట్టులో వీరికి ఒక్క అవకాశం ఇవ్వలేదు. మూడు సిరీస్‌ల నుంచి త్రిపాఠి, రుతురాజ్ బెంచ్ మీద కూర్చుని కూర్చుని ఆ బెంచ్‌లు అరుగుతున్నాయే తప్పా.. వీళ్లు మాత్రం గ్రౌండ్లో కాళ్లు మోపలేకపోతున్నారు.

జింబాబ్వే మీద కూడా అరంగేట్రం చేయనివ్వరా..?

త్రిపాఠికి, రుతురాజ్‌కు ఒక్క మ్యాచ్ కూడా అవకాశం ఇవ్వకపోతే సిరీస్‌ల మీద సిరీస్‌లకు ఎందుకు ఎంపిక చేసినట్లు.. ఎంచక్కా ఇండియాలో డొమెస్టిక్ క్రికెట్ అయినా వాళ్లు ఆడేవారు కదా అంటూ నెటిజన్లు టీం మేనేజ్ మెంట్‌పై గుస్సా అవుతున్నారు. ఆవేశం స్టార్ అవేశ్ ఖాన్‌కు, అసలే ఫాంలో లేని ఇషాన్ కిషన్‌కు అవకాశాలొస్తున్నాయి గానీ.. నిఖార్సైన ప్లేయర్లుగా పేరున్న రుతురాజ్, రాహుల్ త్రిపాఠికి మాత్రం మోక్షం దక్కట్లేదు. జింబాబ్వే లాంటి జట్టుపై కూడా వీళ్లని అరంగేట్రం చేయించకుంటే ఇక వీళ్లకు ఇంకెక్కడ అవకాశాలొచ్చేది.. వీళ్లు ఇంకెపుడు నిలదొక్కుకునేది అంటూ సూటి ప్రశ్నలు గుప్పిస్తున్నారు. ఇక వీరికి అవకాశం కల్పించాల్సిందంటూ నెట్టింట పోస్టులు వెల్లువెత్తుతున్నాయి. కొందరైతే జట్టు సెలెక్షన్ విషయం పట్ల బూతులు కూడా తిడుతున్నారు.

కేఎల్ రాహుల్ భయపడుతున్నాడు

కేఎల్ రాహుల్ కెప్టెన్సీ మీద కూడా కొందరు నిప్పులు చెరుగుతున్నారు. రాహుల్ చాలా ఇన్ సెక్యూర్ ఫెల్లో అని.. ప్రయోగం చేస్తే ఎక్కడ బెడిసికొడుతుందేమోనని భయపడుతున్నాడని.. అతనికి కెప్టెన్సీ నైపుణ్యాలు లేవంటూ కొందరు పేర్కొంటున్నారు. మరికొందరేమో రాహుల్‌ను వెనకేసుకొస్తున్నారు. అసలు రాహుల్ చేసిన తప్పేంటి..? ధావన్ కేవలం వన్డే ఆడతాడు అతన్ని తీసేస్తే ఎలా.. గిల్ మంచిగా నిలదొక్కుకుంటున్న టైంలో అతన్ని తప్పిస్తే ఎలా.. దీపక్ హుడా, సంజూ శాంసన్ చెప్పుకోదగ్గ మ్యాచ్‌లు ఏమైనా ఆడారా, ఇషాన్ కిషన్‌ను ఒకట్రెండు మ్యాచ్‌లను బట్టి అంచనా వేయాలా..? వాళ్లకంటూ సరైన అవకాశం దొరకాలని అందుకే రాహుల్ ఇలాంటి నిర్ణయం తీసుకున్నాడని మెచ్చుకుంటున్నారు.

వాటర్ బాయ్స్‌గా సెలెక్ట్ చేయాల్సింది

అయితే రాహుల్ కెప్టెన్సీలో కొంత బెటరే అయినప్పటికీ.. అతను సిరీస్ గెలిచాక ఏమాత్రం డేరింగ్ డిసిషన్లు తీసుకోకపోవడాన్ని మాత్రం నెటిజన్లు ఏకిపారేశారు. ఇక టీం మేనేజ్‌మెంట్ రాహుల్ త్రిపాఠి, రుతురాజ్ గైక్వాడ్ లాంటి ఆటగాళ్ల కెరీర్లను స్పాయిల్ చేస్తుందని మండిపడుతున్నారు. ఇంకొందరైతే... వాళ్లిద్దరిని స్టేడియం అవతలకు పంపించి.. అక్కడ టూరిస్ట్ ప్రదేశాలను చూసి రమ్మనండి.. జింబాబ్వేకు పోయినదానికి కాస్త ఆ అనుభూతి అన్న ఉంటుందంటూ దెప్పిపొడుస్తున్నారు. త్రిపాఠిని, రుతురాజ్‌ను పొరపాటున జట్టులో ప్లేయర్‌గా సెలెక్ట్ చేశారు.. వాళ్లను వాటర్ బాయ్స్‌గా సెలెక్ట్ చేయాల్సింది.. సరిగ్గా సెట్టయ్యేది అంటూ మరికొందరు కామెంట్లు చేశారు. ఓ నెటిజన్ అయితే సిరీస్ గెలిచాక కూడా సిల్లీ సెలెక్షన్ ఏంటో అంటూ ఎంపికను తప్పుబట్టాడు. మరో నెటిజన్ నా లడ్డూలో టీం.. అంటూ పరోక్షంగా బూతులు తిట్టాడు.